Leevi 5:1-7

¹«Ni nui ta a faa ɠaana, ɓaa é faa mɛni, naa ʋolu é toligi mɛni ga zeeleiti ti ʋa, kɛlɛ é la kɛɛni, nii é kwɛɛ, é ʋa naama zeele wooi wo, ná-faaɠaaza golai ma ɠasɔi ɠa la unma.

²«Siɛgi zu nui ta vɔɔɠuzu la kɔzɔba anii ta ʋa, é la suɠwɛɛ, kɔzɔba zuai ta ma ʋoomai, é ɠɛni ga dɔɓɔ zua, ɓaa toganii ta, ɓaa kpokpo ganii, tɔ ɓɔɠɔi ɠa ɠɔzɔ, é ɠɛ ga sɔba nu.

³«Ni a vɔɔɠuna nui ta ma zii nɔpɛ ba, kɔzɔai, nii a zoo tɔ ɓalaa kɔzɔzu, a suɠwɛɛna nɔ feya, toɠa ɠɛ ga sɔba nu názu.

⁴«Ni nui ta a ɓɔɛna soleyai zu, é ɠona ga toɠa faa ɲɔu ɠɛɛzu ɓaa faa ʋagɔi, é la ɠidaani bu, a suɠwɛɛna nɔ feya, toɠa ɠɛ ga sɔba nu názu.

⁵«Deɠɛmu, zɔi é ɠɛɛzu ga sɔba nu niima vaiti gila su, toɠa la zɔ ga ga ná-kotoi.

⁶Naa ʋoluma ná-kotoi vaa zu é kɛai, toɠa ʋa ga baala saa ɠila ɓaa boli zaa ɠila, é ɠɛ ga koto gba zalaɠai, faazuɓɛtɛ vai zu Ɠɔoɠɔ GALAGI letema. Zekana zalaɠa ɠula nui a koto gba vai ɠɛ la bɛ, ná-kotoi vaa zu.

⁷«Ni ani la nu ya, a baala saai zɔlɔɔ da, ɓaa boli zaai, ná-kotoi vaa zu é kɛai, toɠa ʋa ga kpumago felegɔ, ɓaa poopo kpokpa felegɔ, faazuɓɛtɛ vai zu Ɠɔoɠɔ GALAGI letema. Gilagi ɠɛ ga koto gba zalaɠai, zɔi ɠɛ ga gala zalaɠai.