Leevi 2:9-16

⁹Nii maanɛai, é ɠula ga ɠizɛsui, zalaɠa ɠula nui naa zeɠe ba, é gala, zalaɠa ɠulazuʋɛ. Zalaɠai ʋe, nii abui galazu, makugi nɛai Ɠɔoɠɔ GALAGI ʋɛ.

¹⁰Nii é yɛsu vebɛanii ʋolu, naa ɠa ɠɛ ga Aalɔn ta ná-doun zunuiti tɔnɔ. Toɠa ga anii ɲadega wola zalaɠa aniiti saama, ti ɠalazu abui ɠa, Ɠɔoɠɔ GALAGI ʋɛ.

¹¹«Vebɛanii tanɔpɛ wo ɠɛɛzu feezu Ɠɔoɠɔ GALAGI ʋɛ, ta la ɓɛtɛa ga lɛʋɛi, mazɔlɔɔ wo la ani nɔpɛ gala, nii lɛʋɛi a ɠɛ su, ɓaa kɔin gulɔi, vebɛaniiti saama, ti ɠalazu abui ɠa, Ɠɔoɠɔ GALAGI ʋɛ.

¹²Wa zoo wo ta ɠula Ɠɔoɠɔ GALAGI ʋɛ, ga zooi ʋa lɔnɔ mɔungiti ma vebɛanii, kɛlɛ é mina ɠala zalaɠa ɠulazuʋɛ, eɠɛ vebɛanii makugi nɛai.

¹³«Wa kpoloi ʋu wa-vebɛaniiti kpein ba. Kpoloi mina ʋala wa-vebɛanii zu, wa-ƓALAGI ná-minazeɠegi ma ʋoogi ʋe. Kɛni kpoloi ʋu wa-vebɛaniiti kpein ba.

¹⁴«Ni wa zooi ʋa lɔnɔ mɔungiti ma vebɛanii veena Ɠɔoɠɔ GALAGI ʋɛ, wa ani ɠɔpɔ niinɛiti gee dɛ, naa ʋolu wo ti wolowolo, ma vukɔi ɠula.

¹⁵Wa gulɔi ʋu ma, ta ani maku nɛɛnɛgi. Vebɛani ʋe.

¹⁶Zalaɠa ɠula nui ɠa ma vukɔi ɠilazuʋɛ ɠala, ta gulɔi, é ʋɛɛ ani maku nɛɛnɛgi kpein ba, é ɠɛ ga ɠizɛsui. Zalaɠai ʋe, nii abui galazu, Ɠɔoɠɔ GALAGI ʋɛ.