Leevi 27:8-31

⁸Ni zɔi é minazeɠegi ɠɛai, naa ɠa ga zeaɲaka nu, é la zooga é ʋa sɔngɔi zala, toɠa ʋa ga zɔi nii é kalivaai, é dɛɛ ga zalaɠa ɠula nui. Naa ɠa deve, é soloo ná-sɔlɔɔgi ɠɛʋelei ma.

⁹«Ni nu a minazeɠena ga é suai ta ve Ɠɔoɠɔ GALAGI ʋɛ, nii a zoo ɠulazu ga zalaɠa, naa veeʋɛ Ɠɔoɠɔ GALAGI ʋɛ.

¹⁰Nu la maavaliboga, nu la ma ʋagɔi ʋotogi ɠɛa ga ma ɲɔi, ɓaa ma ɲɔi ʋotogi ɠɛ ga ma ʋagɔi. Ni nu a suai ʋotogi ɠɛɛna ga taɠili, ti felegɔ ta ve Ɠɔoɠɔ GALAGI ʋɛ.

¹¹«Ni nu a minazeɠena ga é sua ɠɔzɔai ta ve Ɠɔoɠɔ GALAGI ʋɛ, nii é la zooga ɠulazu ga zalaɠa, toɠa lɛ ga zalaɠa ɠula nui,

¹²naa ɠa sɔngɔi leve, é zoloo pa pelei ɓaa ɲɔu ʋelei ma, ná-devei ɠa ta yeezei bu.

¹³Ni fee nui ɠa pɔ é unmɔɔ, toɠa ta la ma ga dɔɔlugɔi zeizu ɠilagi.

¹⁴«Ni nui ta wɔinʋɛ ga é ná-pɛlɛi ve Ɠɔoɠɔ GALAGI ʋɛ, é kɛ ga nɔnɔ, zalaɠa ɠula nui ɠa sɔngɔi leve, é zoloo ná-pagi ɓaa ná-ɲɔi ma, ta yeezei naa wu, sɔngɔi nɔpɛ é devezu.

¹⁵Ni zɔi nii é feai, toɠa pɔ é unmɔɔ, toɠa sɔngɔi ma ɠaaɠwɛsu lɔɔlugɔi ɠilazuʋɛ la sɔngɔi ma, naa ɠa ɠɛ ga nɔnɔ ʋolu ga niinɛ.

¹⁶«Ni nui ta a ná-kpalagi veena Ɠɔoɠɔ GALAGI ʋɛ, sɔngɔi liegɔi ɠa ɠwɛɛ, é zoloo ani zuwui liegɔi ma, nii a vaza ba, wali ɠae ʋuulɔɔlugɔ (50) moloi é ga wɔɔlezegi naama ɠilo unsaʋagɔ (300).

¹⁷Ni a ná-kpalagi veena ɓɔɠɔyeema ɠonagi lɔɔzeigi, ta va sɔngɔi liegɔi wu.

¹⁸Ni toɠa ná-kpalagi ve ɓɔɠɔyeema ɠonagi a leʋena, zalaɠa ɠula nui ɠa sɔngɔi ɠaalu, é zoloo konagi liegɔi ma, nii zɛgai ná, eyɛsu ɓɔɠɔyeema ɠonagi zɔi zeeli, ta ta ɠula sɔngɔi liegɔi la.

¹⁹Ni kpala nui ɠa pɔ é ná-kpalagi unmɔɔ, toɠa sɔngɔi ma ɠaaɠwɛsu lɔɔlugɔi ɠilazuʋɛ ʋɛɛ ba, eɠɛʋelei zalaɠa ɠula nui a ɠida la sɔngɔi liegɔi wu, toɠa kpalagi zeɠe ʋolu.

²⁰Ni é la kpalagi unmɔɔni, é ʋɔdi zunui taɠili ma, zobo ge la mɔ ná, é ʋa unmɔɔ,

²¹ɓɔɠɔyeema ɠonagi a zeelina, kpalagi naa ɠa ɠɛ ga Ɠɔoɠɔ GALAGI nɔnɔ, é ɠɛ ga zalaɠa ɠula nui nɔnɔ, eɠɛ kpalagi nii feai Ɠɔoɠɔ GALAGI ʋɛ eyɛsu ɠɔ.

²²«Ni nui ta a kpalagi veena Ɠɔoɠɔ GALAGI ʋɛ, nii é geyaai, é la ʋɛɛni ná-poganiiti ba,

²³zalaɠa ɠula nui ɠa ɠida sɔngɔi liegɔi wu, é zoloo konagi liegɔi ma, a yɛ ná, eyɛsu ɓɔɠɔyeema ɠonagi zɔi zeeli. Zou vee nui ɠa naama walii liegɔi zala, naama voloi nɔ yeei deveai la, mazɔlɔɔ kpalagi veeʋɛ Ɠɔoɠɔ GALAGI ʋɛ.

²⁴Kɛlɛ ɓɔɠɔyeema ɠonagi ma, kpalagi ɠa ɠaaɠale ma naa ma, nii é ɠeyani ma, nii zooi ɓɔɠɔi ɠɛa zea ga poganii.

²⁵«Sɔngɔi kpein ka wo é zoloo seizu ɲadegai ma walii ma, nii ma ɠae ɠilagi wuɲɛgi ga galamu puugɔi.

²⁶«Nu nɔpɛ ge la zooga é ʋa ná-togani ma yiʋo mɔungi ve Ɠɔoɠɔ GALAGI ʋɛ, mazɔlɔɔ ma mɔungi kpein ka niina ga Ɠɔoɠɔ GALAGI nɔnɔi, é ɠɛni ga togani goiti ɓaa ma wolaiti ti-ma yiʋoiti.

²⁷Ni toɠa ɠɛ ga sua ɠɔzɔai ta, é la ɠulaa ga zalaɠa, toɠa unmɔɔ, eɠɛʋelei sɔngɔi la, é sɔngɔi ma ɠaaɠwɛsu lɔɔlugɔi ɠilazuʋɛ zeɠe, é pɛɛ ba. Ni é la unmɔɔni, toɠa ʋɔdi, eɠɛʋelei sɔngɔi la.

²⁸«Naa ʋoluma, nii kpein nu a kona Ɠɔoɠɔ GALAGI ma, kɔligaa zaama ti ga nɔnɔi, naa la zooga ʋɔdizu, ɓaa é ʋa unmɔɔ, é ɠɛni ga nu vului, ɓaa toganii, ɓaa kpalagi é ga zeaɠɔligi. Nii kpein a ɠona Ɠɔoɠɔ GALAGI ma, naa ɠa ɠɛ ga nɔnɔ ta anii gola ɲadegai.

²⁹Anɛɛ ni nuɓusɛi ʋe a kona, nu la zooga é ʋa unmɔɔ, ta naama nui ʋaa.

³⁰«Zooi ná-puusiɛiti, é ɠɛni ga zooi ʋa lɔnɔgiti, ɓaa guluiti gaawaaiti, ta ga Ɠɔoɠɔ GALAGI nɔnɔ, ani ʋe feai Ɠɔoɠɔ GALAGI ʋɛ.

³¹Ni nui ta ɠa pɔ é ná-puusiɛi ma anii ta unmɔɔ, toɠa sɔngɔi ma ɠaaɠwɛsu lɔɔlugɔi ɠilazuʋɛ zeɠe, é pɛɛ ba.