Leevi 23:4-24

⁴«Wɛlɛ Ɠɔoɠɔ GALAGI ná-fɛti volo ɠiligi tanigaa ʋa, niiti wo maanɛai wo nuɓusɛiti toli ma, ti gaalɛba ɲadegai wo naama ɠuiti ma, ti logai.

⁵«Alu mɔungi ma volo puugɔ maazu naanisiɛi (14) ma ɓɔkɔi, kpidii a ʋɛɛna, naa ɠa é ga Ɠɔoɠɔ GALAGI ná-Pakegi.

⁶Alugi naa ma volo puugɔ maazu lɔɔlusiɛi (15), naa ɠa ɠɛ ga ɓului nii lɛʋɛ la su, naa ma vɛtii, Ɠɔoɠɔ GALAGI lɛbi vai ma. Folo lɔfela laawu, wa yɛ ɓului miizu, nii lɛʋɛ la su.

⁷Folo mɔungi, wa gaalɛba ɲadegai wo, wo la boti nɔpɛ kɛa, eɠɛʋelei wa ɗa kɛ la.

⁸Folo lɔfela laawu, wa zalaɠai ɠula, nii abui galazu, Ɠɔoɠɔ GALAGI ʋɛ. Folo lɔfelasiɛi ma, wa nuɓusɛiti toli, wo gaalɛba ɲadegai wo, wo la boti nɔpɛ kɛa, eɠɛʋelei wa ɗa kɛ la.»

⁹Ɠɔoɠɔ GALAGI ɓɔɛni Moize ʋɔ, é ɠɛ ma:

¹⁰«Ɓɔɛ Izelayɛle nuiti pɔ, è ɠɛ ti ma: Siɛgi zu wo ʋaazu lɔɔzu la zooi zu, nii gè feezu wo ya, wa moloi leʋena, wa ʋa ga ma ɠili ɠila, zalaɠa ɠula nui ʋɔ, wa-molo leʋea mɔungi zu.

¹¹Dooɠo foloi ʋoluma zobui, zalaɠa ɠula nui ɠa molo ɠilii latɛɠɛ vai ma ʋoogi ɠɛ, Ɠɔoɠɔ GALAGI ɠakala, naa ɠa a kɛ daazo wo ʋɛ.

¹²Voloi wo ʋaazu molo ɠilii latɛɠɛ vai ma ʋoogi ɠɛɛzu la, wa kona gila baala sinɛi zo, nii nɛɛʋuzu la ba, wo kula ga gala zalaɠai Ɠɔoɠɔ GALAGI ʋɛ.

¹³Wa ɓulu vukɔ ʋagɔi kilo lɔzita ʋɛɛ ba, gaayɔgai ga gulɔi, eɠɛ vebɛanii galaai abui ɠa, makugi nɛai Ɠɔoɠɔ GALAGI ʋɛ, ta puya zalaɠai litɛlɛ ɠila ta tukpɛ (1,5) dɔɔi zu.

¹⁴Aisa naama voloi ʋa zeeli, wo ʋaazu ma ga vebɛanii wa-ƓALAGI ʋɔ, à mina ɓulu mi, ɓaa ani ɠɔpɔ geega, ɓaa molo niinɛi. Naa ɠa ga ɠɔoɠɔ tɔgi wo-mavofodaiti kpein bɛ, ʋɛ nɔpɛ wa zei ná.

¹⁵«Wa dɔɔɠɔi ɠaalu ga dɔfela, é zo dooɠo foloi ʋoluma voloi ma, yeei wo ʋaazu la ga molo ɠili, wo datɛɠɛ mà.

¹⁶É zo dooɠo foloi ma voloi ma, wa folo ʋuulɔɔlugɔ (50) ɠaalu, wo molo niinɛi ma vebɛani ɠili kɛʋele ɓɛtɛ Ɠɔoɠɔ GALAGI ʋɛ.

¹⁷Wa ʋa ga ɓulu felegɔ, wo zeɠe la wo-zeizuʋɛ, wo ti latɛɠɛ, ti ɠilagilagi ɠa ɓɛtɛ ga ɓulu vukɔ ʋagɔi kilo lɔzita, ti mɔ ga lɛʋɛi. Naati ta ga zooi ʋa lɔnɔ mɔungiti Ɠɔoɠɔ GALAGI ʋɛ.

¹⁸Ɓului naati poluma, wa kona gila baala ziʋo lɔfela ɠula ga zalaɠai, nɛɛʋuzu mina ɠɛ ti ʋa, ta nikɛ zinɛ ɓokpa gila ta baala sinɛ felegɔ, ti ɠula ga gala zalaɠai, é ʋɛɛ ta-vebɛanii ʋa, ta ta-ʋuya zalaɠai. Zalaɠai ʋe, nii abui galazu, makugi nɛai Ɠɔoɠɔ GALAGI ʋɛ.

¹⁹Wa boli zinɛi ɠula ga koto gba zalaɠai, ta kona gila baala sinɛ felegɔ, wo kula ga ziilɛi zalaɠai.

²⁰Zalaɠa ɠula nui ɠa ti latɛɠɛ vai ma ʋoogi ɠɛ, Ɠɔoɠɔ GALAGI ɠakala, é ʋɛɛ zooi ʋa lɔnɔ mɔungiti ma ɓului ʋa, é ʋɛɛ baala ziʋo felegɔiti ba. Ta zeɠe, ti ve Ɠɔoɠɔ GALAGI ʋɛ, ti ɠɛ ga zalaɠa ɠula nui nɔnɔi.

²¹Naama voloi nɔ, wa nuɓusɛiti toli, ti gaalɛba ɲadegai wo. Wo la boti nɔpɛ kɛa, eɠɛʋelei wa ɗa kɛ la. Naa ɠa ɠɛ ga ɠɔoɠɔ tɔgi wo-mavofodaiti kpein bɛ, ʋɛ nɔpɛ wa zei ná.

²²«Siɛgi zu wo moloi leʋezu la wa-yooi zu, wa kpala kpelamaʋɛ yɛ ná, wo mina ná leʋe, wo mina ɠale ma posuyɛʋɛi ma. Wa naa yɛ ná bala nuiti bɛ, ta seikɔɠɔma nuiti. Nà ga Ɠɔoɠɔ GALAGI, wa-ƓALAGI.»

²³Ɠɔoɠɔ GALAGI ɓɔɛni Moize ʋɔ, é ɠɛ ma:

²⁴«Ɓɔɛ Izelayɛle nuiti pɔ, è ɠɛ ti ma: Alugi lɔfelasiɛi ma volo mɔungi ma, toɠa ɠɛ ga dooɠo folo wola wo ʋɛ, wo ɠitoo sù, wa puʋugiti fɛ, wo gaalɛba ɲadegai wo.