Leevi 21:1-10

¹Ɠɔoɠɔ GALAGI ɠɛni Moize ma: «Ɓɔɛ zalaɠa ɠula nuiti pɔ, Aalɔn ná-doun zunuiti, è ɠɛ ti ma: Zalaɠa ɠula nui la ɓɔɠɔ ɠɔzɔa ná-nuɓusɛiti saama gɔvɛ maaʋele ma.

²É ɠula ná-nu ɠiteɠitegiti polu, dee, ɓaa kɛɛɠɛ, ɓaa ná-doun zunui, ɓaa ná-doun anzanui, ɓaa kɛɛɠɛloin,

³ɓaa ná-seelai, nii é la dɛ zeini zunu ʋɛ. Toɠa zoo é ɓɔɠɔ ɠɔzɔ ná-seelai naa ʋɛ, tɔɔzei naa ɠa ná-pɛlɛyeɠei wu, é la dɛ lɛɛni zunu ɠili ná-pɛlɛ wu.

⁴Toɠa ga kundiɠii ná-nuɓusɛiti saama, é la ɓɔɠɔ ɠɔzɔa, é ʋa lɔɠɔi ɠoloɠolo.

⁵«Ni saa ɠa lona zalaɠa ɠula nuiti ma, ti la kpaana pɛa tɔungi zu, ti la ɓakalagiti boga, ti la pɔlɔpalɛ lɔa ɓɔɠɔ ma.

⁶Ta ɲade ta-ƓALAGI ʋɛ, ti mina ta-ƓALAGI lɔɠɔi ɠoloɠolo, mazɔlɔɔ ta zalaɠaiti kulazu Ɠɔoɠɔ GALAGI ʋɛ, ná-daamianigi ʋe é ɠalazu abui ɠa. Ti maanɛɛʋɛ, ti ɲade.

⁷Ti la koloɠolo anzanu zeiɗa, ɓaa nii tɔɠɔi ɠoloɠologai. Ti la anzanu zeiɗa, nii sinigi ɠɛlɛai ba, mazɔlɔɔ zalaɠa ɠula nui ɲadegɛ ná-GALAGI ʋɛ.

⁸Wa pɛtɛ ga ɲade nu, mazɔlɔɔ toɠa é daamianigi ɠulazu ga zalaɠai wa-ƓALAGI ʋɛ. Toɠa ɠɛ ga ɲade nu wo ʋɛ, mazɔlɔɔ nɔ̀un ɲadegɛ, nɛ̀i gè ga Ɠɔoɠɔ GALAGI, nii é wo ɲadesu.

⁹Ni zalaɠa ɠula nui ná-doun anzanui a lɔɠɔi ɠoloɠolona ga é lɔ koloɠologi zu, toɠa kɛɛɠɛ lɔɠɔi ɠoloɠolosu, ta gala, é za.

¹⁰«Zalaɠa ɠula nui nii kundiɠilai zea, kɛɛɠɛlointi maazu, nii gulɔ ɲadegai ziaai ma, ta nii zalaɠa ɠula zeɠeiti toai kɔba, é la nɔundeɠaiti zɛga yaɠaba, ta é la ná-seɠeiti balia ga.