Leevi 19:3-17

³«Ɛsɛ gilagilagi ɠa unfe dee ta kɛɛɠɛ ma, é nà-dooɠo foloiti maaɲɛ. Nà ga Ɠɔoɠɔ GALAGI, wa-ƓALAGI.

⁴«À mina ɠaaʋote kɔɔɠɔ ganigiti ma. À mina galagaa ɓɛtɛ ɓɔɠɔ ʋɛ ga kɔlu ɠaawuungi. Nà ga Ɠɔoɠɔ GALAGI, wa-ƓALAGI.

⁵«Siɛgi zu wa ziilɛi zalaɠai ɠulana la Ɠɔoɠɔ GALAGI ʋɛ, wa kɛ, nii a kɛ é daazo.

⁶Ma zuai ɠa mi foloi wo kulazu la ga zalaɠai, ɓaa poluma zobui. Nii é yɛsu ná eyɛsu foloi zaʋasiɛi, naa ɠa ɠala.

⁷Foloi zaʋasiɛi, ni nu a ta miina, toɠa ɠɛ ga anii kɔzɔai, zalaɠai laa la mɔ zoga.

⁸Zɔi a ta miina, ná-faaɠaaza golai ma ɠasɔi ɠa la unma, mazɔlɔɔ toɠa naa ɠɔzɔzu, nii feai Ɠɔoɠɔ GALAGI ʋɛ, naama nui ɓe ka leʋe ná-nuɓusɛiti ba.

⁹«Siɛgi zu wo moloi leʋezu la wa-yooi zu, wa kpala kpelamaʋɛ yɛ ná, wo mina ná leʋe, wo mina ɠale ma posuyɛʋɛi ma.

¹⁰À mina ani ɠɔpɔgiti kula ɓalaa, niiti ti yɛgai wa-leezɛn ɓelei zu. À mina ma waaiti zɛʋɛ, niiti ti loozu. Wa naa yɛ ná bala nuiti bɛ, ta seikɔɠɔma nuiti. Nà ga Ɠɔoɠɔ GALAGI, wa-ƓALAGI.

¹¹«À mina unma wo. À mina zɛɛ wo, ɓaa wo ʋa woya ɓɛtɛ, wo ɠilagilagi wo-zeiɲɔɠɔi laalɔɠɔma.

¹²À mina zɛɛ ɠona wo dàaseigi zu, mazɔlɔɔ wa wa-ƓALAGI lɔɠɔi ɠoloɠolo. Nà ga Ɠɔoɠɔ GALAGI.

¹³«À mina wo-zeiɲɔɠɔi maanɔɠɔ vaa ɠɛ, wo mina unma wo. À mina ɠata nu ná-sala wali ma, é ʋa yɛsu poluma zobui.

¹⁴À mina goizuɓɔlɔ nui ɠoto, wo mina ani nɔpɛ kpesa gaazuɠole nui luɠɔ, nii a ɠɔɠɔziɠa ba, kɛlɛ wa ɠɛ ga GALA gaazuluaba nu. Nà ga Ɠɔoɠɔ GALAGI.

¹⁵«À mina telebotala vaa nɔpɛ kɛ tukpɔɠaaleʋeiti su. À mina topolu ɠɛ bala nui ɓaa nu wolai ʋɛ. Kɛlɛ wa wo-zeiɲɔɠɔi lukpɔɠaaleʋe ga sɔledai.

¹⁶À mina lɔɠɔ ɲɔu vaa ʋɛɛ wa-nuɓusɛiti ta ʋa. À mina zɛɛ zeele woo wo wo-zeiɲɔɠɔi laalɔɠɔma, a ɠɛ ga saa zaɓu. Nà ga Ɠɔoɠɔ GALAGI.

¹⁷«À mina wo-ɠɛɛloin wɔinzeɠe wo-yiimaʋɛ. À dama, wa ɠɛna zelii loga wo-ɠɛɛloin ma, wo mina koto la ɓɔɠɔ unma tɔun ná-faa zu.