Leevi 19:1-32

Click on verse(s) to share them!

¹Ɠɔoɠɔ GALAGI ɓɔɛni Moize ʋɔ, é ɠɛ ma:

²«Ɓɔɛ Izelayɛle ʋɛbɛi kpein pɔ, è ɠɛ ti ma: À ɲade, mazɔlɔɔ ɲàdegɛ, nà, Ɠɔoɠɔ GALAGI, wa-ƓALAGI.

³«Ɛsɛ gilagilagi ɠa unfe dee ta kɛɛɠɛ ma, é nà-dooɠo foloiti maaɲɛ. Nà ga Ɠɔoɠɔ GALAGI, wa-ƓALAGI.

⁴«À mina ɠaaʋote kɔɔɠɔ ganigiti ma. À mina galagaa ɓɛtɛ ɓɔɠɔ ʋɛ ga kɔlu ɠaawuungi. Nà ga Ɠɔoɠɔ GALAGI, wa-ƓALAGI.

⁵«Siɛgi zu wa ziilɛi zalaɠai ɠulana la Ɠɔoɠɔ GALAGI ʋɛ, wa kɛ, nii a kɛ é daazo.

⁶Ma zuai ɠa mi foloi wo kulazu la ga zalaɠai, ɓaa poluma zobui. Nii é yɛsu ná eyɛsu foloi zaʋasiɛi, naa ɠa ɠala.

⁷Foloi zaʋasiɛi, ni nu a ta miina, toɠa ɠɛ ga anii kɔzɔai, zalaɠai laa la mɔ zoga.

⁸Zɔi a ta miina, ná-faaɠaaza golai ma ɠasɔi ɠa la unma, mazɔlɔɔ toɠa naa ɠɔzɔzu, nii feai Ɠɔoɠɔ GALAGI ʋɛ, naama nui ɓe ka leʋe ná-nuɓusɛiti ba.

⁹«Siɛgi zu wo moloi leʋezu la wa-yooi zu, wa kpala kpelamaʋɛ yɛ ná, wo mina ná leʋe, wo mina ɠale ma posuyɛʋɛi ma.

¹⁰À mina ani ɠɔpɔgiti kula ɓalaa, niiti ti yɛgai wa-leezɛn ɓelei zu. À mina ma waaiti zɛʋɛ, niiti ti loozu. Wa naa yɛ ná bala nuiti bɛ, ta seikɔɠɔma nuiti. Nà ga Ɠɔoɠɔ GALAGI, wa-ƓALAGI.

¹¹«À mina unma wo. À mina zɛɛ wo, ɓaa wo ʋa woya ɓɛtɛ, wo ɠilagilagi wo-zeiɲɔɠɔi laalɔɠɔma.

¹²À mina zɛɛ ɠona wo dàaseigi zu, mazɔlɔɔ wa wa-ƓALAGI lɔɠɔi ɠoloɠolo. Nà ga Ɠɔoɠɔ GALAGI.

¹³«À mina wo-zeiɲɔɠɔi maanɔɠɔ vaa ɠɛ, wo mina unma wo. À mina ɠata nu ná-sala wali ma, é ʋa yɛsu poluma zobui.

¹⁴À mina goizuɓɔlɔ nui ɠoto, wo mina ani nɔpɛ kpesa gaazuɠole nui luɠɔ, nii a ɠɔɠɔziɠa ba, kɛlɛ wa ɠɛ ga GALA gaazuluaba nu. Nà ga Ɠɔoɠɔ GALAGI.

¹⁵«À mina telebotala vaa nɔpɛ kɛ tukpɔɠaaleʋeiti su. À mina topolu ɠɛ bala nui ɓaa nu wolai ʋɛ. Kɛlɛ wa wo-zeiɲɔɠɔi lukpɔɠaaleʋe ga sɔledai.

¹⁶À mina lɔɠɔ ɲɔu vaa ʋɛɛ wa-nuɓusɛiti ta ʋa. À mina zɛɛ zeele woo wo wo-zeiɲɔɠɔi laalɔɠɔma, a ɠɛ ga saa zaɓu. Nà ga Ɠɔoɠɔ GALAGI.

¹⁷«À mina wo-ɠɛɛloin wɔinzeɠe wo-yiimaʋɛ. À dama, wa ɠɛna zelii loga wo-ɠɛɛloin ma, wo mina koto la ɓɔɠɔ unma tɔun ná-faa zu.

¹⁸À mina nɔnɔ ʋotokula vaa ɠɛ, wo mina faa zei yiima wa-nuɓusɛiti ta laalɔɠɔma. Wa wo-zeiɲɔɠɔi nɛɛ ʋɛ, eɠɛ wa ɓɔɠɔi. Nà ga Ɠɔoɠɔ GALAGI.

¹⁹«Wa ɠolo nà-deveiti bɛ. À mina sua ma zii felegɔ ʋu ɓɔɠɔ ma, ti ʋa pɛɛpolu wo. À mina ani zuwu zii felegɔ woli wa-ɓalagi ʋa. À mina seɠe loo ɠɔba fɛlɛai ga gezei ma zii felegɔ.

²⁰«Siɛgi zu zunui ta a laana ga duɔ anzanui ta, nii maazogai zunu ɠili bɛ, é la unmɔɔni, é la ɓɔɠɔ yeema, ta faa zuɠoloɠologi ɓɛtɛ, kɛlɛ ti la ti ʋaa, mazɔlɔɔ anzanui naa la ɓɔɠɔ yeema.

²¹Zunui ɠa ʋa ga baala sinɛ ɠila, Ɠɔoɠɔ GALAGI ʋɔ, ga ná-faa zuɓɛtɛ zalaɠai GALA daaɠomi seɠe ʋɛlɛi laaʋɛ.

²²Zalaɠa ɠula nui ɠa koto gba vai ɠɛ tɔun bɛ, Ɠɔoɠɔ GALAGI ɠakala, ná-kotoi vaa zu é kɛai, é kɛ ga baala sinɛi, é kulazu ga faazuɓɛtɛ zalaɠai, kotoi naa é kɛai, suvaa ɠa yɛ bɛ.

²³«Siɛgi zu wo liizu la zooi ná zu, wa ɓena ga gwaa wului ma zii pɛ siin, wa ti-ma waaiti pɛtɛ kona saʋagɔ laawu ga ti ɠɔzɔʋɛ, à mina ta mi ɲɛgɛlɛin.

²⁴Konagi naanisiɛi ma, wa ti-ma waaiti kpein fe Ɠɔoɠɔ GALAGI ná-maamusɛ vaa zu.

²⁵Konagi lɔɔlusiɛi ma, wa zoo wo ma waaiti ta mi. Ni wa naa ɠɛɛna, wa-ɠulanumai ɠa li ga wɔɔlɔa. Nà ga Ɠɔoɠɔ GALAGI, wa-ƓALAGI.

²⁶«À mina sua nɔpɛ mi, nii ɲamai su. À mina ɓɔɠɔ lɔ zoɠo vaa zu, ta ungaiziɛ vaa nɔpɛ.

²⁷À mina wɔungiti buuwo, wo mina wo-ɓakalagiti bo.

²⁸À mina wɛn dɔ wo-ɠɔlɔgi ma gɔvɛ ʋɛ, wo mina pɔlɔpalɛ lɔ ɓɔɠɔ ma. Nà ga Ɠɔoɠɔ GALAGI.

²⁹«À mina wo-loun anzanui ɠaazu unfe seɠe ga wo ʋa dɔ koloɠologi zu, galagi tanɔpɛ dɛbi vaa ma, naa ɠa a kɛ zooi zu nuɓusɛiti ti mina lɔ koloɠologi zu, ná zulaa a ʋa ve ga kɔzɔba vai.

³⁰Wa nà-dooɠo foloiti maaɲɛ, wo unfe sèizu ɲadegai ma. Nà ga Ɠɔoɠɔ GALAGI.

³¹«À mina li, wo ʋa gɔvɛ laawooleʋe nuiti gaazaɠa, ɓaa niiti gɔvɛiti ti ʋelela ʋele vaiti bosu ti ma. À mina ti ɠaiziɛ, wo mina ɓɔɠɔ ɠɔzɔ ga tiye. Nà ga Ɠɔoɠɔ GALAGI, wa-ƓALAGI.

³²«Wa wuzeɠe un kolegiti kpein bɛ, wo kɛwola ʋɔlɔi lɛbi. Wa lua wa-ƓALAGI ʋa. Nà ga Ɠɔoɠɔ GALAGI.