Leevi 17:3-11

³«Ni Izelayɛle nui ta a nikɛi ɓaa baalagi, ɓaa bolii ɠɔdaaleʋena ga zalaɠai ti-ʋuuzuʋɛ, ɓaa ti-ʋuuzuʋɛ ʋoluʋɛ,

⁴é la liini la GALA daaɠomi seɠe ʋɛlɛi laaʋɛ, é ʋa kɛ ga vebɛanii Ɠɔoɠɔ GALAGI ʋɛ ná-seɠe ʋɛlɛ ɲadegai ɠakalaʋɛ, naama nui ɠa ɠɛ ga sɔba nu, tɔɔzei é ɲamai ʋua. Kpe ka leʋe ná-nuɓusɛiti ba, é ɠula ti zaama.

⁵Naa ɠa a kɛ, Izelayɛle nuiti ti mina mɔ ta-zalaɠa aniiti kula dɔɓɔiti su, kɛlɛ ti ɗa ʋa ga tiye zalaɠa ɠula nui ʋɔ, Ɠɔoɠɔ GALAGI ɠakala GALA daaɠomi seɠe ʋɛlɛi laaʋɛ, é ti ɠula ga zalaɠai Ɠɔoɠɔ GALAGI ʋɛ, ga ziilɛi zalaɠaiti.

⁶Zalaɠa ɠula nui ɠa ma ɲamai vaza Ɠɔoɠɔ GALAGI ná-zalaɠa ɠulazuʋɛ ma, GALA daaɠomi seɠe ʋɛlɛi laaʋɛ, é ma wulɔi ɠala, nii makugi a nɛɛ Ɠɔoɠɔ GALAGI ʋɛ.

⁷Ti la mɔ ta-zalaɠaiti kulaa zɛɛ ɠalagiti bɛ, niiti ti-ʋaaɠulabaiti ti ga boli zinɛiti, niiti ti ɠɛa ɓɔɠɔ ɠɔzɔzu ga tiye. Toɠa ɠɛ ga ɠɔoɠɔ tɔgi ti ʋɛ, ta ti-mavofodaiti kpein.

⁸«Ɗa ɠɛ ti ma mɔnɔ: Ni Izelayɛle nui ta, ɓaa seikɔɠɔma nui ta, é ti zaama, a gala zalaɠai ɠulana, ɓaa zalaɠai taɠili,

⁹é la liini la GALA daaɠomi seɠe ʋɛlɛi laaʋɛ, é ʋa kula ga zalaɠai Ɠɔoɠɔ GALAGI ʋɛ, naama nui ɓe ka leʋe ná-nuɓusɛiti ba.

¹⁰«Ni Izelayɛle nui ta, ɓaa seikɔɠɔma nui ta, é ti zaama, a ɲamai ma zii tanɔpɛ miina, nà ʋoluave naama nui ʋa, nii é ɲamai miizu, nà naama nui ɓeteʋe ɓalaa ná-nuɓusɛiti ba, é ɠula ti zaama.

¹¹Mazɔlɔɔ ɲamai ɠa é ga kpɛtɛanii kpein zɛnvui. Gè feeʋɛ wo ya, ga wo koto gba vai ɠɛ la zalaɠa ɠulazuʋɛ, wo-yɛnvuiti faa zu, mazɔlɔɔ tɛi é ga zɛnvui ma ʋoogi, naa maaʋele ɠa ɲamai a kotoi gba la.