Leevi 16:12-34

¹²Toɠa ani maku nɛɛnɛ gala liɠii ta zeɠe, daavegai ga abulekaiti, seɠeai zalaɠa ɠulazuʋɛ Ɠɔoɠɔ GALAGI ɠaazu, ta é zeeɲɛ felegɔ zeɠe ani maku nɛɛnɛgi ma vukɔi zu. Toɠa li ga naama aniiti seɠe zuɠooza golai ʋoluʋɛ.

¹³Toɠa ani maku nɛɛnɛgi ʋu abui ɠa Ɠɔoɠɔ GALAGI ɠaazu, naa ɠa a kɛ ani maku nɛɛnɛgi ma luului kesui lakulugi maalɔɔɠu, nii é zeele woo ɠesui maazu, naazu é la mɔ za pɛ.

¹⁴Toɠa nikɛ zinɛi ma ɲamai zeɠe, é faza ga yeeɓeɠai kesui lakulugi ɠakala ʋelei, folo ɠulazu ʋelei, é ɲamai vaza ga yeeɓeɠai, ná zeizu ɠɛ lɔfela, kesui lakulugi ɠakala ʋelei.

¹⁵Toɠa koto gba woli zinɛi ɠɔdaaleʋe nuɓusɛiti bɛ, é li ga ma ɲamai seɠe zuɠooza golai ʋolu ʋelei. Ʋelei nɔ é kɛai la ga nikɛ zinɛi ma ɲamai, zekana nɔ a kɛɛ la ga naa ma ɲamai, toɠa faza kesui lakulugi ma ta kakala ʋelei.

¹⁶«Ʋele ɠana a koto gba vai ɠɛ la ada ɲadega wolai ʋɛ Izelayɛle nuiti ta-ɠɔzɔba vaiti faa zu, ta ta-lɔ koloɠologiti kpein maaʋele zu, ti kotoi ɠɛai ga ti maaʋele. Toɠa kɛ ɠana nɔ GALA daaɠomi seɠe ʋɛlɛi ʋɛ, mazɔlɔɔ toɠa kɔzɔba nuɓusɛiti saama.

¹⁷Nu nɔpɛ ge la yɛ ga GALA daaɠomi seɠe ʋɛlɛi wu, siɛgi zu é lɛɛzu la ga é koto gba vai ɠɛ ada ɲadega wolai, eyɛsu é ɠula ná. Toɠa koto gba vai ɠɛ tɔ ɓɔɠɔi ʋɛ, ta ná-pɛlɛyeɠei, ta Izelayɛle ʋɛbɛi kpein bɛ.

¹⁸«A ɠɛna ɠulaa, toɠa li zalaɠa ɠulazuʋɛ, nii é Ɠɔoɠɔ GALAGI ɠakala, é koto gba vai ɠɛ, zalaɠa ɠulazuʋɛ ʋɛ, é nikɛ zinɛi ta boli zinɛi ma ɲamai zeɠe, é siɛ zalaɠa ɠulazuʋɛ minɛiti ma, maaɠoolii pɛ su.

¹⁹Toɠa ɲamai vaza ga zeeɓeɠai, ná zeizu ɠɛ lɔfela, zalaɠa ɠulazuʋɛ ma. Toɠa kole, é ɲade, Izelayɛle nuiti ta-ɠɔzɔba vaiti faa zu.

²⁰«Siɛgi zu é ɓesu da ga koto gba vai ɠɛ ada ɲadega wolai ʋɛ, ta GALA daaɠomi seɠe ʋɛlɛi ʋɛ, ta zalaɠa ɠulazuʋɛ ʋɛ, toɠa boli zinɛi ma vului maaɓuɠa ʋa.

²¹Aalɔn ɠa yee felegɔiti pɛɛ boli zinɛi ma vului unmaʋɛ, é la zɔ ga maazu ga Izelayɛle nuiti ta-vaa ɲɔiti kpein, ta ta-lɔ koloɠologiti kpein, niiti ti kotoi ɠɛa ga ti maaʋele. Toɠa ti la boli zinɛi unma, naa ʋolu, é kpɛ, é li teʋebai zu, zunu ɠila ge ɓɔ ba, nii kɛʋele ɓɛtɛai.

²²Ta-vaa ɲɔiti ta yɛ boli zinɛi ʋa, ti kpɛ, é li teʋebai zu, é li zooi naa zu, ʋɛ ná ɲakai.

²³«Aalɔn ɠa lɛ GALA daaɠomi seɠe ʋɛlɛi wu, é geze zeɠeiti kula, niiti é ɠɛa ti looni tɛɛzuʋɛ ada ɲadega wolai. Toɠa ti la ná.

²⁴Toɠa maagba ada ɲadegai ta, é ná-seɠeiti seɠe ʋolu. Naa ʋolu toɠa ɠula, é ná-gala zalaɠai ɠula, ta nuɓusɛiti ta-ɠala zalaɠai, é koto gba vai ɠɛ ɓɔɠɔ ʋɛ, ta nuɓusɛiti bɛ.

²⁵Toɠa koto gba zuai ma wulɔi ɠala zalaɠa ɠulazuʋɛ.

²⁶«Zɔi a bolii ɓɛ, nii kotoi yɛgai da, naa ɠa ná-seɠeiti gba, é maagba, naa ʋoluma toɠa lɛ niina ti-ʋuuzuʋɛ.

²⁷Koto gba zalaɠai ma nikɛ zinɛi ta koto gba woli zinɛi niiti ti ti-ma ɲamai zeɠeai, ti ʋaa la ada ɲadega wolai koto gba vai zu, ta li ga tiye ti-ʋuuzuʋɛ ʋoluʋɛ, ti ma ɠɔlɔiti gala abui ɠa, ta ma zuai, ta ma ɓooiti.

²⁸Zɔi a gala, naa ɠa ná-seɠeiti gba, é maagba. Naa ʋolu toɠa lɛ niina ti-ʋuuzuʋɛ.

²⁹«Nii ɠa ɠɛ wo ʋɛ ga ɠɔoɠɔ tɔgi, alugi lɔfelasiɛi ma volo puugɔi ma, wa zugi zo, wo la boti nɔpɛ kɛa, é ɠɛni ga zou loun, ɓaa wɛɛin nii é ga seikɔɠɔma nui wo zaama.

³⁰Mazɔlɔɔ naama volo ná, ta koto gba vai ɠɛ wo ʋɛ, naa ɠa a kɛ wo ɲade. Wa ɲade wa-ɠotoiti kpein faa zu, Ɠɔoɠɔ GALAGI ɠaazu.

³¹Toɠa ɠɛ wo ʋɛ ga dooɠo folo wolai, wa zugi zo. Toɠa ɠɛ wo ʋɛ ga ɠɔoɠɔ tɔgi.

³²«Koto gba vai ɠa ɠɛ zalaɠa ɠula nui ya, nii gulɔi ziaai ma, feai bɛ̀ ga é ʋilɛ kɛɛɠɛ ʋotogi zu zalaɠa ɠula vai zu. Toɠa ɓɔɠɔ maaɠili ga zalaɠa ɠula zeɠeiti, ti ga gezei.

³³Toɠa koto gba vai ɠɛ ada ɲadega wolai ʋɛ, ta GALA daaɠomi seɠe ʋɛlɛi ʋɛ, ta zalaɠa ɠulazuʋɛ ʋɛ. Toɠa koto gba vai ɠɛ ɓalaa zalaɠa ɠula nuiti bɛ, ta nuɓusɛiti kpein bɛ.

³⁴Toɠa ɠɛ wo ʋɛ ga ɠɔoɠɔ tɔgi, koto gba vai ɠa ɠɛ, naa ɠɛ ɠila kona-o-kona, Izelayɛle nuiti ta-ɠotoiti kpein faa zu.» Naa ɠɛɛni, nii Ɠɔoɠɔ GALAGI ma levei veeni Moize ya.