Leevi 14:11-25

¹¹Zalaɠa ɠula nui nii é ɲade fai ɠɛɛzu, naa ɠa zunui ɠula kɛlɛma, nii é ɓɔɠɔ ɲadesu, ta naama aniiti kpein Ɠɔoɠɔ GALAGI ɠaazu, GALA daaɠomi seɠe ʋɛlɛi laaʋɛ.

¹²Zalaɠa ɠula nui ɠa baala ziʋo zinɛiti gila seɠe, é kula ga faazuɓɛtɛ zalaɠai, é ʋɛɛ gulɔi litɛlɛ ɠaaɠwɛsui ʋa. Toɠa ti latɛɠɛ vai ma ʋoogi ɠɛ Ɠɔoɠɔ GALAGI ɠaazu.

¹³Toɠa baala ziʋoi ɠɔdaaleʋe, ʋɛ ta ɗa koto gba zalaɠa zuaiti kɔdaaleʋe ná, ta gala zalaɠaiti, ada ɲadegai ta, mazɔlɔɔ faazuɓɛtɛ zalaɠai ma zuai ɠa ga zalaɠa ɠula nui nɔnɔ, eɠɛʋelei koto gba zalaɠai ma zuai la, ani ʋe gola ɲadegai.

¹⁴Zalaɠa ɠula nui ɠa faazuɓɛtɛ zalaɠa zuai ma ɲamai ta zeɠe, é siɛ naa yeezazu woi yɔkpɔgi ma, nii é ɓɔɠɔ ɲadesu, ta zeezazu yeezinɛ kpotogi ma, naa ʋɛɛ zeezazu ɠɔɠɔzinɛkpotogi ʋa.

¹⁵Toɠa gulɔi ta zeɠe, é pu ɠɔʋɛzu yeei ɠa.

¹⁶Toɠa yeeɓeɠai lɔ gulɔi wu, nii é kɔʋɛzu yeei ɠa, é gulɔi vaza daa ɠɛ lɔfela ga yeeɓeɠai Ɠɔoɠɔ GALAGI ɠaazu.

¹⁷Toɠa gulɔi ta zeɠe, nii é kɔʋɛzu yeei ɠa, é siɛ naa yeezazu woi yɔkpɔgi ma, nii é ɓɔɠɔ ɲadesu, ta zeezazu yeezinɛ kpotogi ma, naa ʋɛɛ zeezazu ɠɔɠɔzinɛkpotogi ʋa, ʋɛ faazuɓɛtɛ zalaɠa zuai ma ɲamai ziaai ná.

¹⁸Zalaɠa ɠula nui ɠa gulɔi mɔtai zeɠe, zɛgai zea, é siɛ naa nɔungi ma, nii é ɓɔɠɔ ɲadesu, naa ɠa a kɛ é koto gba vai ɠɛ tɔun bɛ Ɠɔoɠɔ GALAGI ɠaazu.

¹⁹Naa ʋoluma, toɠa koto gba zalaɠai ɠula, é koto gba vai ɠɛ naa ʋɛ, nii é ɓɔɠɔ ɲadesu ná-kɔzɔba vai ma. Naa ʋolu toɠa gala zalaɠa loganii ɠɔdaaleʋe.

²⁰Toɠa gala zalaɠai ta vebɛanii ɠula zalaɠa ɠulazuʋɛ. Toɠa koto gba vai ɠɛ zunui naa ʋɛ, naa ɠa ɲade.

²¹«Ni toɠa ga bala nui, ná-sɔlɔɔgiti ti la kula ɠɛa su, toɠa baala ziʋo zinɛ ɠila nɔ zeɠe, nii a ɠula ga faazuɓɛtɛ zalaɠai, é datɛɠɛ vai ma ʋoogi ɠɛ, koto gba vai ɠɛ la tɔun bɛ. Toɠa ɓulu vukɔ ʋagɔi kilo saʋagɔ zeɠe, gaayɔgai ga gulɔi, ta gulɔi litɛlɛ ɠaaɠwɛsui, é ɠɛ ga vebɛanii.

²²Toɠa kpumago felegɔ zeɠe ɓalaa, ɓaa poopo kpokpa felegɔ, eɠɛʋelei ná-sɔlɔɔgiti ti la. Gilagi ɠɛ ga koto gba zalaɠai, zɔi ɠɛ ga gala zalaɠai.

²³Folo lɔsaʋasiɛi, toɠa ʋa ga naama aniiti kpein zalaɠa ɠula nui ʋɔ, GALA daaɠomi seɠe ʋɛlɛi laaʋɛ, Ɠɔoɠɔ GALAGI ɠaazu, ná-ɲade fai zu.

²⁴Zalaɠa ɠula nui ɠa faazuɓɛtɛ zalaɠai ma ʋaala ziʋoi zeɠe ta gulɔi. Toɠa ti latɛɠɛ vai ma ʋoogi ɠɛ Ɠɔoɠɔ GALAGI ɠaazu.

²⁵Toɠa faazuɓɛtɛ zalaɠai ma ʋaala ziʋoi ɠɔdaaleʋe. Zalaɠa ɠula nui ɠa faazuɓɛtɛ zalaɠa zuai ma ɲamai ta zeɠe, é siɛ naa yeezazu woi yɔkpɔgi ma, nii é ɓɔɠɔ ɲadesu, ta zeezazu yeezinɛ kpotogi ma, naa ʋɛɛ zeezazu ɠɔɠɔzinɛkpotogi ʋa.