Leevi 13:2-56

²«Siɛgi zu nui ta ɠɔlɔgi maaɓokolosu da, ɓaa poʋoɠulɔi ɠɛ ma, ɓaa gɛlɛɠɛlɛgi, nii é ɠɛɛzu ga kulama zeeɓɛi kɔlɔgi ma, ta lii la zalaɠa ɠula nui Aalɔn ʋɔ, ɓaa ná-doun zunui taɠila pɔ.

³Zalaɠa ɠula nui ɠa seeɓɛi ɠɛʋele ʋɛtɛ, nii kulaai kɔlɔgi ma. Ni ma leɠai ɠoleʋɛ su, é yei, suɠooza kɔlɔgi ʋa, toɠa ga kulama zeeɓɛi ma zii ta. Zalaɠa ɠula nui ɠa kɛʋele ʋɛtɛ, é dɛɛ ga nui naa ɠɔzɔʋɛ.

⁴Ni ani ɠolekolegi é kɔlɔgi ma, é la yeini, su ʋa ɠooza kɔlɔgi ʋa, ma leɠai la ɠoleni, zalaɠa ɠula nui ɠa naama nui lɛ pɛlɛi wu, é daaɠulu ma, é yɛ ná folo lɔfela laawu.

⁵Zalaɠa ɠula nui ɠa kɛʋele ʋɛtɛ foloi lɔfelasiɛi ma. Ni seeɓɛi la ɠɛ liini luɠɔma, ta é la vazani kɔlɔgi ma, zalaɠa ɠula nui ɠa tɛ pɛlɛi wu mɔnɔ ná zeizu velesiɛi, é daaɠulu ma folo lɔfela laawu.

⁶Zalaɠa ɠula nui ɠa kɛʋele ʋɛtɛ, ná zeizu velesiɛi foloi lɔfelasiɛi ma. Ni tago zuzasaga, é la vazani kɔlɔgi ma, zalaɠa ɠula nui ɠa dɛɛ ga nui naa ɲadegɛ, poʋoɠulɔi ʋe. Toɠa ná-seɠeiti gba, toɠa ɲade.

⁷Kɛlɛ ni poʋoɠulɔi a vazana kɔlɔgi ma, é ɓɔɠɔ lɛa ʋoluma ga zalaɠa ɠula nui, naa dɛɛ ga ɲadegɛ, toɠa ɓɔɠɔ lɛ ga zalaɠa ɠula nui ná zeizu velesiɛi.

⁸Naa ɠa kɛʋele ʋɛtɛ. Ni poʋoɠulɔi vazagɛ kɔlɔgi ma, zalaɠa ɠula nui ɠa dɛɛ ga kɔzɔʋɛ. Kulama zeeɓɛi ma zii ta ʋe.

⁹«Siɛgi zu kulama zeeɓɛi ma zii ta ɠɛɛzu la nui ta ʋa, ta lii la zalaɠa ɠula nui ʋɔ.

¹⁰Naa ɠa kɛʋele ʋɛtɛ. Ni kɔlɔgi maaɓokologɛ, é ɠole, ta maaɓokolosuʋɛ ma leɠai ɠole, ta ma zua lɛtɛgi ɓokolo su,

¹¹kulama zeeɓɛi ʋe é naama nui ɠɔlɔgi wu. Zalaɠa ɠula nui ɠa dɛɛ ga kɔzɔʋɛ, é la tɛa pɛlɛ wu, é ʋa daaɠulu ma, mazɔlɔɔ kɔzɔʋɛ.

¹²Ni kulama zeeɓɛi a ɠulana ma, é kɔlɔgi maazeɠe, é zo nɔungi ma, eyɛsu é zeeli kɔɠɔiti ma, ʋɛti zalaɠa ɠula nui ɠaazulosu naati ba,

¹³naa ɠa kɛʋele ʋɛtɛ. Ni a kaana ga kulama zeeɓɛi kɔlɔgi maaʋɛ pɛ seɠea, toɠa dɛɛ ga nui nii seeɓɛi ba, ɲadegɛ, tɔɔzei maaʋɛ ɠolea ɲɛgɛlɛin, ɲadegɛ.

¹⁴Kɛlɛ voloi ta ma zua lɛtɛgi ɠaa la tɔun ba, toɠa ɠɔzɔ.

¹⁵Zalaɠa ɠula nui ɠa kɛʋele ʋɛtɛ. Ni a ma zua lɛtɛgi ɠaana, toɠa dɛɛ ga kɔzɔʋɛ. Ma zua lɛtɛgi ɠɔzɔʋɛ, kulama zeeɓɛi ma zii ta ʋe.

¹⁶Ni ma zua lɛtɛgi a valibona, é ɠole, toɠa li zalaɠa ɠula nui ʋɔ bɛ.

¹⁷Naa ɠa kɛʋele ʋɛtɛ. Ni kɔlɔgi maaɠolea, zalaɠa ɠula nui ɠa dɛɛ ga nui nii seeɓɛi ba, ɲadegɛ.

¹⁸«Siɛgi zu divologi losu la nui ta ʋa, divologi zeɠe ba, é ɠɛdɛ,

¹⁹ʋɛ divologi ɠɛni ná, ani ɓudɔ ɠole ga ɠulana ná, ɓaa ani ɠolegi maaɓɔikpɔigai, naama nui ɠa ɓɔɠɔ lɛ ga zalaɠa ɠula nui.

²⁰Zalaɠa ɠula nui ɠa kɛʋele ʋɛtɛ. Ni seeɓɛi yeiʋɛ, suɠooza kɔlɔgi ʋa, ta ma leɠai ɠole, zalaɠa ɠula nui ɠa dɛɛ ga kɔzɔʋɛ. Kulama zeeɓɛi ma zii ta ʋe, nii kulaai divologi zu.

²¹Kɛlɛ ni zalaɠa ɠula nui a kaana ga seeɓɛi zuzasagɛ, é la yeini, su ʋa ɠooza kɔlɔgi ʋa, ma leɠai ʋa ɠole, toɠa nui naa lɛ pɛlɛi wu, é daaɠulu ma folo lɔfela laawu.

²²Ni seeɓɛi a vazana kɔlɔgi ma, zalaɠa ɠula nui ɠa dɛɛ ga kɔzɔʋɛ. Kulama zeeɓɛi ma zii ta ʋe.

²³Kɛlɛ ni seeɓɛi a yɛna ada ɠilagi nɔ, é la vazani maaʋɛ, toɠa ga divologi ma ʋilii. Zalaɠa ɠula nui ɠa dɛɛ ga ɲadegɛ.

²⁴«Siɛgi zu abui nui ta maaɠalazu la, gɛlɛɠɛlɛ kolegi ɠula galazuʋɛ ʋogi zu, ɓaa koleai maaɓɔikpɔi,

²⁵zalaɠa ɠula nui ɠa kɛʋele ʋɛtɛ. Ni ma leɠai a ɠolena gɛlɛɠɛlɛgi zu, é yei suɠooza kɔlɔgi ʋa, kulama zeeɓɛi ʋe, nii kulaai gala ʋilii zu. Zalaɠa ɠula nui ɠa dɛɛ ga nui naa ɠɔzɔʋɛ. Kulama zeeɓɛi ma zii ta ʋe.

²⁶Kɛlɛ ni zalaɠa ɠula nui a kaana ga seeɓɛi zuzasagɛ, é la yeini, su ʋa ɠooza kɔlɔgi ʋa, ma leɠai ʋa ɠole, toɠa nui naa lɛ pɛlɛi wu, é daaɠulu ma folo lɔfela laawu.

²⁷Zalaɠa ɠula nui ɠa kɛʋele ʋɛtɛ foloi lɔfelasiɛi ma. Ni seeɓɛi vazaga kɔlɔgi ma, zalaɠa ɠula nui ɠa dɛɛ ga kɔzɔʋɛ. Kulama zeeɓɛi ma zii ta ʋe.

²⁸Kɛlɛ ni seeɓɛi a yɛna ada ɠilagi nɔ, é la vazani kɔlɔgi ma, suzasaga, gala ʋilii maaɓokologi nɔ ʋe, zalaɠa ɠula nui ɠa dɛɛ ga ɲadegɛ, mazɔlɔɔ gala ʋilii ʋe.

²⁹«Siɛgi zu seeɓɛi ɠɛɛzu la zunui ta ɓaa anzanui ta nɔungi zu, ɓaa nɛkpɛi ʋa,

³⁰zalaɠa ɠula nui ɠa seeɓɛi ɠɛʋele ʋɛtɛ. Ni zeiʋɛ, suɠooza kɔlɔgi ʋa, ma leɠai ma ɓɔikpɔigi ɠa su, pɛlɛʋɛlɛgai, zalaɠa ɠula nui ɠa dɛɛ ga nui naa ɠɔzɔʋɛ. Gɛlɛɠɛlɛgi ʋe, kulama zeeɓɛi ma zii ta ʋe é nɔungi zu, ɓaa é nɛkpɛi ʋa.

³¹Ni zalaɠa ɠula nui a kaana ga seeɓɛi la yeini, su ʋa ɠooza kɔlɔgi ʋa, ma leɠa ʋagɔ la ná, toɠa tɛ pɛlɛi wu, é daaɠulu ma folo lɔfela laawu.

³²Zalaɠa ɠula nui ɠa seeɓɛi ɠɛʋele ʋɛtɛ foloi lɔfelasiɛi ma. Ni ma leɠai ma ɓɔikpɔi ge la su ɲɛgɛlɛin, seeɓɛi la vazani ma, é ʋa yei, su ʋa ɠooza kɔlɔgi ʋa,

³³zɔi seeɓɛi ma, naa ɠa nɔungi wo ta kpɛlɛi, kɛlɛ é la miná woga, ʋɛ seeɓɛi ná. Zalaɠa ɠula nui ɠa tɛ pɛlɛi wu mɔnɔ ná zeizu velesiɛi, é daaɠulu ma folo lɔfela laawu.

³⁴Zalaɠa ɠula nui ɠa seeɓɛi ɠɛʋele ʋɛtɛ foloi lɔfelasiɛi ma. Ni seeɓɛi la vazani ma, é ʋa yei, su ʋa ɠooza kɔlɔgi ʋa, zalaɠa ɠula nui ɠa dɛɛ ga ɲadegɛ. Toɠa ná-seɠeiti gba, toɠa ɲade.

³⁵Kɛlɛ ni seeɓɛi a vazana kɔlɔgi ma, dɛai ʋoluma ga ɲadegɛ,

³⁶zalaɠa ɠula nui ɠa kɛʋele ʋɛtɛ. Ni seeɓɛi vazagɛ kɔlɔgi ma, zalaɠa ɠula nui la mɔ wɛlɛa ga ma leɠa ɓɔikpɔi faa, kɔzɔʋɛ.

³⁷Ni seeɓɛi la liini luɠɔma gaazu, ma leɠa ʋagɔiti ti ʋɔnɔga, seeɓɛi ɠɛdɛga, é ɲadega. Zalaɠa ɠula nui ɠa dɛɛ ga ɲadegɛ.

³⁸«Siɛgi zu gɛlɛɠɛlɛ kolegiti ti ɠulazu la zunui ta ɓaa anzanui ta maaʋɛ,

³⁹zalaɠa ɠula nui ɠa kɛʋele ʋɛtɛ. Ni gɛlɛɠɛlɛgi ɠaaɠolekolegɛ, seeɓɛi ʋe, é la ɲɔuni, nui naa ɲadegɛ.

⁴⁰«Siɛgi zu zunui ta ɠɛɛzu ná la, undeɠa la unma, toɠa ga kpaana nui, ɲadegɛ.

⁴¹Ni undeɠa la unma tosaamaʋɛ, é ʋa toʋala ʋelei, kpaana nui ʋe kakala ʋelei, ɲadegɛ.

⁴²Kɛlɛ ni seeɓɛi koleai maaɓɔikpɔi naa ɠa kpaanagi zu, kakala ʋelei ɓaa polu ʋelei, kulama zeeɓɛi ɠana, kulaai kpaanagi zu.

⁴³Zalaɠa ɠula nui ɠa kɛʋele ʋɛtɛ. Ni seeɓɛi ɓokologɛ, é ɠole, maaɓɔikpɔi kpaanagi zu, polu ʋelei ɓaa kakala ʋelei, kulaai ga kulama zeeɓɛi kɔlɔgi ma,

⁴⁴kulama zeeɓɛi ma zii ta ʋe, kɔzɔʋɛ. Zalaɠa ɠula nui ɠa dɛɛ ga kɔzɔʋɛ. Nɔungi zu ɠa seeɓɛi ná.

⁴⁵«Seeɓɛ nui ɠa ná-seɠei ʋali ga, é too ɠɔba, é nɔundeɠaiti zɛ yaɠaba, é daaʋɛ maalɔɔɠu, é ɗa kpeei loo, é ɗa ɠɛ: ‹Kɔ̀zɔʋɛ! Kɔ̀zɔʋɛ!›

⁴⁶Eyɛsu seeɓɛi ɓe ba, toɠa yɛ kɔzɔyai zu. Tɔɔzei kɔzɔʋɛ, tɔ ɠila ka a zei yɛ, seizuʋɛ ɠa ɠɛ ga ti-ʋuuzuʋɛ ʋoluʋɛ.

⁴⁷«Siɛgi zu fuinfuingi ʋogi a ɠɛna la seɠei zu, baala deɠa zeɠei zu, ɓaa geze zeɠei zu,

⁴⁸ɓaa fɛlɛ zeɠei zu, ɓaa kɔlɔ zeɠei ta ʋa, ɓaa kɔlɔ zɔɔlai tanɔpɛ ba,

⁴⁹ni fuinfuingi ʋogi a ɓiinkpiinna ɓaa é ɓɔikpɔi seɠei zu, ɓaa kɔlɔi zu, fuinfuingi ʋe, maanɛai é lɛ ga zalaɠa ɠula nui.

⁵⁰Zalaɠa ɠula nui ɠa kɛʋele ʋɛtɛ. Toɠa naama anii lɛ pɛlɛi wu, é daaɠulu ma folo lɔfela laawu.

⁵¹Toɠa kɛʋele ʋɛtɛ foloi lɔfelasiɛi ma. Ni fuinfuingi ʋogi a vazana seɠei zu, ɓaa kɔlɔi ma, toɠa ga fuinfuingi, é sumiizu, anii naa ɠɔzɔʋɛ.

⁵²Toɠa seɠei ɠala, ɓaa kɔlɔi, niigi fuinfuingi ʋogi ba, mazɔlɔɔ fuinfuingi ʋe, é sumiizu. Toɠa ɠala.

⁵³«Kɛlɛ ni zalaɠa ɠula nui a kaana ga fuinfuingi ʋogi la vazani seɠei zu, ɓaa kɔlɔi,

⁵⁴zalaɠa ɠula nui ɠa devei ve ga ti naa gba, nii fuinfuingi ʋɛai ba. Toɠa tɛ pɛlɛi wu, é daaɠulu ma ná zeizu velesiɛi folo lɔfela laawu.

⁵⁵Zalaɠa ɠula nui ɠa fuinfuingi naa ʋɛtɛ, anii naa gbaai ʋoluma. Ni fuinfuingi ʋogi la zeɠeni ɠɛʋele ma, anɛɛ ni é la vazani, anii naa ɠɔzɔʋɛ. Toɠa ɠala, anɛɛ ni fuinfuingi ɠa gaazu ʋagɔi ɓaa gaazu ɲɔi ma.

⁵⁶Ni a kaana ga fuinfuingi ʋogi ɠaazasaga, anii naa gbaai ʋoluma, toɠa ná leʋe seɠei ʋa, ɓaa kɔlɔi.