Leemiso Maxaafaa 8:2-31

²Ogiyaa doonan de7iya keratu bollinne ogeti danttettiyoosan a eqqausu;

³dirssaa penggiyaa lanqqen, katamaa geliyo penggen eqqada, ba qaalaa xoqqu oottada, hagaadan yaagausu;

⁴“Inttenoo asatoo, taani inttena xeesais; taani asa ubbaa xeesais.

⁵Inttenoo akeekai paccidoogeetoo, hayyuwaa demmanau tamaarite. Inttenoo eeyyatoo, akeekaa demmite.

⁶Taani daro lo77obaa odiyo gishshau siyite; taani odiyoobai ubbai suurebaa.

⁷Taani tumaa odais; worddobaa taani ixxais.

⁸Taani haasayiyoobai ubbai tuma; geella woikko mirqqetta gidenna.

⁹Akeeki de7iyo urau ta haasayai likke; erai de7iyoogeetau ta haasayai qoncce.

¹⁰“Biraa aggidi, ta zoriyaa doorite; muruta worqqaakka aggidi, eratettaa doorite.

¹¹Aissi giikko taani, aadhdhida eratettiyaa, inqquwaa giyo daro al77o shuchchaappekka aadhdhais; neeni amottiyoobai ubbaikka tanaara laggetanau danddayenna.

¹²“Taassi, aadhdhida eratetteessi akeekai de7ees; eratettaikka adussa qofaikka tanaara issippe de7oosona.

¹³Godaassi yayyiyoogee iitatettaa ixxiyoogaa; taani otoruwaanne ayyuwaa ixxais; iitasaa efiya ogiyaanne worddo haasayaa dosikke.

¹⁴Zoreenne lo77o erai taageeta; akeekainne wolqqainne taassi de7oosona.

¹⁵Kawoti tanan kawotoosona; qassi haariyaageeti suure higgiyaa tanan kessoosona.

¹⁶Halaqati taani maaddin, deriyaa haaroosona; sa7an dere haariya gita asata ubbaakka taani maaddais.

¹⁷“Taani tana siiqiyaageeta siiqais; tana minttidi koyiyaageetikka demmana.

¹⁸Duretettainne bonchchoi tanaara de7oosona; wurenna aqoinne injjee ta mataana.

¹⁹Intte taappe demmiyo go77ai muruta worqqaappenne seerissi kessido biraappe aadhdhees.

²⁰Taani xillotettaa ogiyan hemettais; suure pirddaa loossuwaara kanttais.

²¹Tana siiqiyaageetau taani aquwaa immana; eta keettaakka taani kunttana.

²²“GODAI tana ba ooso ubbaappe koiro medhdhiis; benippekka a oosuwau doomettai tana.

²³Beni wode, biittai sa7ai merettanaappe kase taani sunttettaas.

²⁴Gita abbati bainna wode, haattaa pulttoti xuuqqenna wode, he wode taani yelettaas.

²⁵Deretinne kerati bantta sohuwan merettanaappe kase taani yelettaas.

²⁶GODAI sa7aanne sa7an de7iya gadeta ubbaa medhdhanaappe kase, woikko issi kophphe gidiya koiro sophphee oosettanaappe kase taani yelettaas.

²⁷“GODAI salota miccido wodenne gita abbatuppe bollaara salo gufanttuwaa giigissido wode, taani yan de7ais.

²⁸GODAI shaarata bollan wottido wode, gita abbaa pulttota xuussido wode,

²⁹abbaa haattati banttau imettida zawaappe pinnidi, bollau aadhdhennaadan, i eta azazido wode, sa7aa baasuwaa i baasido wode, taani yan de7ais.

³⁰He wode taani a matan waanna oosanchcha; ubba gallassi taani a ufaissais; taukka a sinttan ufaittais.

³¹I medhdhidobai ubbai, sa7aikka asaa naatikka tana ufaissoosona.