Leemiso Maxaafaa 7:4-27

⁴Aadhdhida eratettaa ne michchidan, akeekaakka ne mata dabbodan xeella.

⁵Eti nena shaaramuxiya maccaaseeppenne ba qaalan cimmiya azina machchippe naagana.

⁶Issi gallassi taani ta keettaa maskkootiyaara kare xeellaas;

⁷xeellada wozanaa kunttibeenna wodalla naata be7aas. Eta giddoppe issoi keehi eeyya.

⁸He wodallai ogiyaara biidi, issi shaaramuxa maccaasee keettaa mataara kanttiis; i soo efiya ogiyaakko pinnidi, i keettaa heeran hemettees.

⁹He wode sa7ai qammanau lankkilankkees.

¹⁰Hegaappe guyyiyan, maccaasiyaa a demmaasu. A shaaramuxa gidiyoogaa i maayoi erissees. A asaa cimmanau halchchada kiyaasu.

¹¹A xalanne yeelli bainna maccaasa; son woppu gaada uttukku.

¹²A issitoo ogiyan, issitoo giyan, dabaaba ubban eqqada naagausu.

¹³A he na7aa qoommada yeraasu; a a aifiyaa tishshi ootta xeellaidda hagaadan yaagaasu;

¹⁴“Taani ta yarshshuwaa yarshshada, ta shiiquwaa ha77i gatta simmais.

¹⁵Yaatada nena xomoosanau kiyaas; nena keehi koyaas; ha77i simmi demmaas.

¹⁶Taani Gibxxeppe yiida, alleequwaara de7iya anssollaakka ta hiixan yeggaas.

¹⁷Taani karbbiyaa, almmuniyaanne qarafaa geetettiya sawotuppe kessido shittuwaa ta hiixan caccafaas.

¹⁸Haaya; ane wonttana gakkanaashin siiquwaa aloos; qoomettidikka ufaittoos;

¹⁹aissi giikko, ta keettaawai son de7enna; haahosaa manddara biis.

²⁰Biiddi miishshaa qarcciitaa kuntti ekkidi biido gishshau, aginai goobanan uttennan soo simmenna” yaagaasu.

²¹Yaagada ba mal77o haasayan a sheleeshshaasu; ba liiqo inxxarssan cimmaasu.

²²Yaatin, sohuwaarakka i o kaallidi, bi aggiis. Boorai shukkiyoosaa laagettiyoogaadan, gaarai eesotidi piriyan geliyoogaadan,

²³gelin zubbee a wozanaa caddiyoogaadan haniis. Gitiyaa giddo gelida kafo milatiis. Hagee ubbai au a shemppuwaa maanau haniyoogaa eribeenna.

²⁴Ta na7au, ane ha77i siya; ta doonaappe kiyiya qaalaakka ezgga.

²⁵Ne qofai he maccaaseera booppo; i ogiyan gelada xayoppa.

²⁶A caddada olidoogeeti unddenna; a woridoogeetikka keehi daro.

²⁷I soi duufuwaakko efiya badaasa oge; he ogee duge haiquwaa geessuwau kaalettees.