Leemiso Maxaafaa 3:1-24

¹Ta na7au, taani nena tamaarissiyoogaa dogoppa; ta azazotakka ne wozanan wotta.

²Aissi giikko, eti ne bariyaa adussana; ishalo de7uwaakka neeyyo gujjana.

³Aggenna siiqoinne tumatettai neeppe haakkoppona; eta ne qooriyan qachcha; ne wozanankka eta xaafa.

⁴Yaatikko, neeni Xoossaanne asaa sinttan sabettananne nashettana.

⁵Ne polo wozanan GODAA ammanetta; ne akeekan zemppoppa.

⁶Neeni oottiyo ooso ubban a sinttaya; i nena likke ogiyaa kaalettana.

⁷Nena ne huuphen aadhdhida eranchcha kessoppa; GODAASSI yayya; iitaappekka haakka.

⁸Hegee ne bollaa payya wottana; ne meqettaakka xallana.

⁹GODAA ne duretettan bonchcha; koiro aifida katta ubbaappekka xeeraa ayyo immiyoogan a bonchcha.

¹⁰Yaatikko, ne gootaratun kattai kumana; ne baattaakka aife woine eessai kumidi palahana.

¹¹Ta na7au, GODAA seeraa karoppa; i nena qaxxayiyo wodekka lanccoppa.

¹²Aissi giikko, aawai ba siiqiyo na7aa seeriyoogaadan, GODAI ba ufaittiyo uraa seerees.

¹³Aadhdhida eratettaa demmiya urai, akeekaakka babaa oottiya urai anjjettidaagaa.

¹⁴Aissi giikko, appe demmiyo go77ai biraappe demmiyo go77aappe aadhdhees; appe beettiya go77ai worqqaappe beettiya go77aappe kehees.

¹⁵Aadhdhida eratettai inqquwaappe keehi al77o; neeni demmanau amottiyo ubbai aadhdhida eratettaara likkettenna.

¹⁶Aadhdhida eratettai ne bariyaa adussees; i neeyyo duretettaanne bonchchuwaa gujjees.

¹⁷A ogeti ufaissiya ogeta; a loosso ubbaikka saro.

¹⁸I bana oiqqiyaageetussi de7o mitta; a mintti oiqqiya ubbatikka anjjettidaageeta.

¹⁹GODAI ba aadhdhida eratettan sa7aa medhdhiis; ba akeekankka salota minttiis.

²⁰A eratettan shaafati goggoosona; shaaratuppekka irai bukkees.

²¹Ta na7au, lo77o aadhdhida eratettaanne adussi qoppiyoogaa naaga; eti neeppe shaahettoppona.

²²Eti neeyyo de7o gidana; eti neeyyo ishalonne ufaissa de7uwaa immana.

²³He wode neeni ne ogiyan hirggi bainnan hemettana; ne tohoikka xubettenna.

²⁴Neeni zin77ido wode, yayyakka; zin77adakka mal77o xiskkuwaa xiskkana.