Leemiso Maxaafaa 30:13-29

¹³Otoruwaa meexxiya asatinne asa karidi xeelliya asati de7oosona.

¹⁴Eta achchai biso mala gidin, eta manggaagai billama mala gidin, hiyyeesatanne metootanchchata naaqqidi, etabaa bonqqiya asati de7oosona.

¹⁵Ullatteessi naa77u macca naati de7oosona. Eti, “Hamma! Hamma!” yaagidi waassoosona. Mulekka kalli erenna heezzubati de7oosona; oiddanttoi qassi mule, “Gidana” gi erenna.

¹⁶Hegeetikka: duufuwaa, maine maccaasaa, haatti kalissi erenna mela biittaanne, “Tau gidana!” gi erenna tamaa.

¹⁷Ba aawaa baceessiya na7aa aifiyaa, ba aayyiyaa cimin kariya na7aa aifiyaa, zanggaaran de7iya quuroti woocana; a ashuwaa ankkoti maana.

¹⁸Tana heezzubati maalalissoosona; oiddanttoi ubba taayyo gelenna.

¹⁹Hegeetikka: arggantti saloora paalliyo paaluwaa, shooshshi shuchchaa bollaara sololiyo sololettaa, markkabee abbaa bollan solddiyo soldduwaanne wodallinne geela7oi siiquwaa doommiyo doomettaa.

²⁰SHaaramuxa maccaasiyaa haniyo hanoikka hegaa mala. A muussaa mausu; shin miidoogaappe guyyiyan, ba doona quccarggada, “Taani ainne moorabeikke” yaagausu.

²¹Heezzu yohotun biittai qaaxxees; oiddanttuwaa ubba tookkanaukka danddayibeenna.

²²Hegeetikka: aillee kawotido wode, eeyyai kattaa kallido wode,

²³asi ixxido maccaasiyaa azina gelido wodenne macca ashkkariyaa ba godiyo laattido wode merettiya hanotaa.

²⁴Sa7aa bolli oiddu guutta meretati de7oosona; shin eti keehi aadhdhida eranchcha.

²⁵Hegeetikka: Cunccalleta - cunccalleti wolqqi bainna mereta; shin banttau miyoobaa bone shiishshidi, minjjoosona.

²⁶Guppalleta - guppalleti guutta wolqqai de7iyoogeeta; shin bantta keettaa shuchchaa kooppuwan keexxoosona.

²⁷Booleta - booletussi kawoi baawa; shin eti ubbaikka maaran mankkan zattoosona.

²⁸Zareta - zareti kushiyan oiqqinkka oiqettoosona; shin eti harai attin, kawo keettankka de7oosona.

²⁹Bantta maataa bessiiddi hemettiya heezzu meretati de7oosona; oiddanttoikka lo77o hemetaa hemettees.