Leemiso Maxaafaa 23:1-26

¹Neeni deriyaa haariyaagaara qumaa maanau uttido wode, ne sinttan de7iyaagaa loittada akeeka.

²Neeni daro yora asa gidikko, naagetta.

³I nena paaccanau danddayiyo gishshau, aadhdhida mal77o qumau yiiqetoppa.

⁴Duretanau daafuroppa; hegaa mala keesiyaa agganau cincca gida.

⁵Hegaa mala duretettai neeni xeellishin xayana; qefiyaa kessidi argganttaagaadan, saluwaa paallana.

⁶Uuziyaa qumaa mooppa; a mal77o qumaakka maanau amottoppa.

⁷Milatissanau i nena, “Ma; uya” yaageesippe attin, a wozanai nenaara de7enna.

⁸Neeni miido qiiba qumaa cooyana; ne galataikka hada gidana.

⁹Eeyyaassi payyabaa haasayoppa; aissi giikko, ne aadhdhida era haasayaa i karana.

¹⁰Beni zawaa shoddoppa; qassi aawi bainna naatu gadiyaa zawaa sugoppa;

¹¹aissi giikko, eta ashshiya GODAI mino; i eta gishshaa nenaara mootettana.

¹²Ne asttamaaree neessi odiyoogaa ezgga; ne haittaakka eraa qaalaakko yegga.

¹³Na7a seerennan aggoppa; neeni a qaixaariyan wadhdhikko, i haiqqenna.

¹⁴Neeni a qaixaariyan wadhdhikko, a shemppuwaa haiquwaappe ashshaasa.

¹⁵Ta na7au, neeni aadhdhida eranchcha gidikko, ta wozanaikka ufaittana;

¹⁶ne inxxarssai suurebaa haasayiyo wode, ta wozanai ufaittees.

¹⁷Nagaranchchata qanaatoppa; shin ubbatoo GODAASSI yayyiyoogaa aggoppa.

¹⁸Yaanikko neeyyo sinttanau sa7i kehana; sinttappe yaana kehikka neeyyo xayenna.

¹⁹Ta na7au, siya; wozannaama gida; ne wozanaa suure ogiyan wotta.

²⁰Daro woine eessaa uyiyaageetuuranne ashuwaa muussau yaaretiyaageetuura zuppetoppa;

²¹aissi giikko, mattottiyaageetinne yoranchchati manqqana; xiskkuwaa daroi asaa wurida curqqaa maizissees.

²²Nena yelida ne aawai odiyoobaa siya; ne aayyiyaakka ceeggido wode karoppa.

²³Tumaa, aadhdhida eratettaa, timirttiyaanne akeekaa shammappe attin, mulekka baizzoppa.

²⁴Xillo na7aa aawai keehippe ufaittana; wozannaama na7aa yelida urikka an poccu gaana.

²⁵Ne aawainne ne aayyiyaa ufaittona; nena yelidaarakka poccu gu.

²⁶Ta na7au, ta zoriyaa ezgga; taani haniyoogaadan hana.