Lau Guguya 2:6-21

⁶Hoꞌowa ipuna E ginauli, ainiya haba hoꞌowa E yahi be umaꞌuma laulau idahedi E fanom hoꞌowadi.

⁷Egu tau lau fayofayo tatau yo wawahin E unedi, yo egu tau lau fayofayo haisa mate egu luma yai sa tubu. Egu bulumakau yo sipi baiwadi sa ouli, habahim dodoga haisa Yelusalem yai.

⁸Siluba yo gole aiʼegu E abidi. Babaꞌisa yo nuʼu boludi edi gogo loholohodi hinaga E abidi. Tau wana tatau yo wawahin E fasinabodi hinaga. Tau lau fayofayo wawahin boludi E faidi sa famala doha lalahugu.

⁹Yau E hasai wananaha habahim dodoga haisa Yelusalem yai.

¹⁰Matagu yai somo E ita mate E fanuha bena E abi, yo nuwagu moho tanoꞌubu kwadena. In moho nuwagu ya loholoho egu paisowa lisina yai paꞌana egu abi peꞌipeꞌi logena maisagu.

¹¹Fuyanna ginauli mahudoꞌina nimagu yai E ginauli yo somo E ankamkamnaꞌen be loholoho E abi, E mainene sipoi be E lobahi mate ginauli mahudoꞌina te, hige aniyodi. Doha hwayau E tafotafo watan, hige agu loge. Maihala yai hige somo laꞌi ya abi. Ginauli mahudoꞌina ganahewana yai te mate E sibasiba wananaha.

¹²Habahim egu nuwanuwatuhu E bui be sibasiba E ita sipoi. Kabakabaleya yo gelogeloma hinaga E nuwatuhu fadosidi. Kin, somo haꞌa ya ginauli mate, tau lau fadamahina haba somo hesa ya ginauli?

¹³E nuwatuhu lobahi mate sibasiba ya loholoho wananaha, habahim yauyaule, doha mala ya loholoho wananaha, habahim kamumu.

¹⁴Tau sibasiba ena aba lau ya sibai na yauyaulena higeꞌe. In moho E nuwatuhu lobahi mate, luwaluwagadi edi fuya ofi nenena esega.

¹⁵Habahim nuwagu yai yawa, “Yau haba E peꞌi doha doga yauyaulena.” Be sibasiba lebena yai somo haba E abi? Ite hinaga hige aniyona.

¹⁶Logena doga sibasibana haba doha yauyaulena, sa nuwa fuiyen maꞌamaꞌaen. Lahaidi sa laolaoma ibege ti nuwatuhuidi. Doga sibasibana hinaga bena ya peꞌi, doha doga yauyaulena!

¹⁷Logena mwahuli te, E ꞌwaiyoꞌoꞌen, paꞌana paisowa maihala yai ya faꞌankamkamnagu. Mahudoꞌina hige aniyona doha hwayau E tafotafo watan, na hige agu loge.

¹⁸Ginauli mahudoꞌidi E ginaulidi maihala yai mate, E waiyoꞌoꞌedi wananahaidi, paꞌana ibe E lau afuledi, mate doga hesa muligu yai haba aiꞌena.

¹⁹Doga sibasibana e yauyaulena, sai ya sibai? Ma adidiligu yai, egu sibasiba yo adidili yai, paisowa mahudoꞌidi E ginaulidi maihala yai. In moho haba ya tanuwagaidi. Ite hinaga hige aniyona.

²⁰Paisowa yai E abi peꞌipeꞌi, E nuwatuhui be nuwagu ya kuꞌu.

²¹Doga gonowana ena sibasiba yai ena paisowa ya ginauli, na habahim ya lau afulen, be sai hige i kamna heyayaꞌen, aiꞌena. Ite ya heyaya wananaha yo hinaga hige aniyona.