Lau Guguya 12:1-8

¹Ma hewahewalimiu yo ma hasahasalamiu, tabu Tau Ginaulimiu au nuwa fuiyen, doꞌata emi fuya tautaulaꞌi yo tinatinalaꞌi yai auwe, “Hige amna hesa loholohona ai lobahi.”

²Bena ami nuwatuhui, doꞌata emi fuya tautaulaꞌi yo tinatinalaꞌi yai, matamiu sa gafu doha maihala, nawalahi yo kipwala sa ꞌwahuꞌwahuhuli yo doha usa yadadi galewa sa fafakamumu.

³Nimamiu, aba bobodiyemiu hola hige ti tabutabubu, yo ahemiu sa fafaꞌadidilimiu hola hige ti belubelu, moꞌamiu hola hige ti gabo lisina yai ami anꞌan aba mamaina, matamiu ma loholohodi lisina yai ami itaꞌita, mate bena Tau Ginaulimiu, ami nuwatuhui.

⁴Beyamiu lisina yai dagugu edaꞌeda yai emi aba atahiyenna. Hola hige ti doꞌo, yo wawahin sa paipaisowa dagugudi, wana yo dagugu hesa - hesa, hola ami ataꞌatahiyedi mate, bena Yaubada ami nuwatuhui. Ataiꞌa edi gwane yai haba sa fanohimiu in moho ibege au atahi komakoman.

⁵Tau Ginaulimiu bena ami nuwatuhui, yo edaꞌeda launa ami ꞌwasabuwedi, doꞌata ami beꞌu. Kulumiu hola hige ti fou ofi doha didiyali tayadi, yo hola hige au lau welawelai. Doha kupati hanahanau haba ya peꞌi, yo emi amna hola hige ti tomatoma, mate bena ami nuwatuhui. Ma mwahumwahulimiu bena ami nuwatuhui. Tabu au bagibagi ee–, peꞌi fuyana, yena ami peꞌi, haba ami lau Biula. Na dodoga haba halamiu sa tan eloꞌelolosi.

⁶Aho te, au nuwatuhui paꞌana haba ami peꞌi doha mahina pwalana ya tamotu, yo gulewa ya tamo golugolu yo doha hoꞌowa aba yahiyahi ya tamo golugolu, yo balawa, hoꞌowa aba yahiyahina ya tamotu.

⁷Ami peꞌi, haba ami fuyo tanohi, na yaluwamiu haba sa fuyo Yaubada lisina.

⁸Yau, Tau lau faꞌata, yawa, “Ginauli mahudoꞌidi hige aniyona! Kufana!”