LAASUUDEE 9:1-16

¹Ma beeenↄ laasuu lɛ̀ píngi, ben ma zɛo kɛ̀ gbɛ̃ maaanↄ kↄ̃n ↄ̃ndↄ̃rinↄ kↄ̃n ń yãkɛnanↄↄ kú Luda ↄzĩmɛ. Gbɛ̃ke ègↄ̃ dↄ̃ tó yenzi ke zangu e a dãaro.

²Yã dↄ̃nkↄ̃ bé èe baade píngi dãa, yãpuradeenↄ kↄ̃n nↄ̀sɛpãsĩdeenↄ, gbɛ̃ maaanↄ kↄ̃n gbɛ̃ zaaanↄ, gbãsĩsaideenↄ kↄ̃n gbãsĩdeenↄ, ludagbãgbãrinↄ kↄ̃n ludagbãgbãrisainↄ. Lán à dɛ kↄ̃n gbɛ̃ maaanↄ nà, lɛn à dɛ lɛ kↄ̃n durunkɛrinↄ. Lán à dɛ nà kↄ̃n gbɛ̃ kɛ̀ aↄ̃è la daanↄ, lɛn à dɛ lɛ kↄ̃n gbɛ̃ kɛ̀ aↄ̃è la daroonↄ.

³Yã kɛ̀ è kɛ anduna guu píngi nↄ̀sɛyakayãmɛ, kɛ̀ yã dↄ̃nkↄ̃ bé è gbɛ̃ píngi le. Yã zaaa kↄ̃̀ gbɛ̃nteenↄ swɛ̃̀n, yↄ̃nkↄyã bé è dↄńnɛ aɛ, à gbɛra aↄ̃è tá gɛ̀wãan.

⁴Gurↄↄ kɛ̀ gbɛ̃ kú wɛ̃̀ndio ègↄ̃ tãmaa vĩ. Gbɛ̃ɛ kɛ̀ bɛ̃ɛ see sã̀ↄ dɛ músu gɛ̀la.

⁵Gbɛ̃ bɛ̃ɛnↄↄ dↄ̃ kɛ̀ aↄ̃é ga, gɛ̀nↄ sↄ̃ↄ pↄ́ke dↄ̃ro. Aↄ̃ láada ke vĩ dↄro, aↄ̃ yã é dↄ gbɛ̃ken dↄro.

⁶Aↄ̃ yena gbɛ̃zi kↄ̃n ń zana gbɛ̃n-o kↄ̃n ń nↄ̀sɛgↄ̃aanↄo gɛ̃̀ zɛ́lan gwe. Aↄ̃ bà égↄ̃ kú kↄ̃n yã kɛ̀ è kɛ anduna guuo ziki dↄro.

⁷Ǹ gá ǹ n pↄ́ ble kↄ̃n pↄnnaao, ǹ n geepiwɛ̃ɛ mi kↄ̃n yáadↄnao, zaakɛ Luda n yãkɛna pìnↄ sáabu kpà kↄ̀.

⁸Ǹgↄ̃ uta puraa dana gurↄ píngi. Ǹtongↄ̃ kuu nↄ́si dↄkↄna n mìa sairo.

⁹Ǹ pↄnnaa kɛ kↄ̃n n naↄ̃ yenzideeo n wɛ̃̀ndi kori kɛ̀ Ludaa kpàmma anduna guu lɛ́n, zaakɛ n bakan gwe gurↄↄ kɛ̀ n ísimma gà nɛ́ɛ kpaa anduna guu.

¹⁰Zĩi kɛ̀ n ↄ nà a kɛnaa, ǹ kɛ n gbãa lɛ́n, zaakɛ zĩi ke yãgↄ̃gↄ̃na ke dↄ̃na ke ↄ̃ndↄ̃ↄ kú gɛ̀wãan kɛ̀ nɛ́ɛ taanlo.

¹¹Má è anduna guu dↄ kɛ̀ bàkpakↄ̃sↄ̃blena è kɛ bà nna yãnlo, zĩ̀blena è kɛ gbãa yãnlo, pↄ́ble'ena è kɛ ↄ̃ndↄ̃ yãnlo, auziki'ena è kɛ wɛ́ɛzɛ̃ yãnlo, nna kↄ̃n gbɛ̃nↄ è kɛ kyódↄ̃na yãnlo, zaakɛ gurↄ zaa kↄ̃n kisiao è ń lé ń píngi,

¹²gbɛ̃kee gurↄↄ kɛ̀ yã zaaa é a lee dↄ̃ro. Lán kpↄ̀ kɛ̀ sì táaru guu bà, lán bãa kɛ̀ bà kũ̀ bà, lɛn guu è dↄ gbɛ̃nɛ zaazaa à à kũ kùsu lɛ.

¹³Ma ↄ̃ndↄ̃ ke taka è anduna guu, à yã ma kũ gbãa.

¹⁴Lakutu kee kuu yã, à gbɛ̃nↄↄ pariro, ben kína gbãadee mↄ̀ à lɛ̀ɛa à lìga à bĩizi.

¹⁵Gↄ̃gbɛ̃ takaaside ↄ̃ndↄ̃de kee kú lakutu pì guu, à lakutu mì sì kↄ̃n a ↄ̃ndↄ̃ↄo, ben takaasidee pì yã e dↄ gbɛ̃kenlo.

¹⁶Ben ma bè ↄ̃ndↄ̃ↄ dɛ gbãaala, mↄde wè kya ká takaaside ↄ̃ndↄ̃ↄn, wè à yã daro.