LAASUUDEE 7:15-25

¹⁵Ma wɛ̃̀ndi kori kɛ̀ guu ma yã kɛ̀nↄ è píngi. Ma gbɛ̃ maaa è, à gà a maakɛna guu, ma gbɛ̃ zaaa è, èe gì kɛɛ a yãzaakɛna guu.

¹⁶Ǹton tó n maakɛna ↄ gɛ̃ro, ǹton tó n ↄ̃ndↄ̃ↄ ↄ gɛ̃ro. À kɛ̀ dia nɛ́ n zĩnda kaatɛɛ?

¹⁷N zaaa tón ↄ gɛ̃ro, ǹtongↄ̃ yↄ̃nkↄↄ ũro. À kɛ̀ dia nɛ́ ga n gurↄↄ ãa?

¹⁸À maa ǹgↄ̃ yã mɛ̀n plaaa pìnↄ kũnamɛ, ǹton ↄ kpáziro, zaakɛ gbɛ̃ kɛ̀ Luda vĩa vĩ è à plaaa pìnↄ zɛ́ e píngimɛ.

¹⁹Ɔ̃ndↄ̃ↄ è tó ↄ̃ndↄ̃dee gbãaa gↄ̃ dɛ wɛ́tɛ gbãade gↄ̃ↄn kurinↄla.

²⁰Gbɛ̃ maaa kɛ̀ ègↄ̃ yã maaa kɛɛ kɛ̀ è durun kɛroo kú anduna guuro.

²¹Ǹton swã kpá yã kɛ̀ gbɛ̃nↄↄ e oozi píngiro, lɛ ǹton ma n zĩkɛri e n sↄ̃sↄ̃ↄro.

²²Zaakɛ ń dↄ̃ n zĩndanɛ, kɛ̀ mpi se n gbɛ̃nↄ sↄ̃̀sↄ̃ pari.

²³Ma yã beeenↄ gwà kↄ̃n ↄ̃ndↄ̃ↄo píngi, ma zɛo kɛ̀ mà ↄ̃ndↄ̃ kũ, ben à zã̀ kũ̀mao.

²⁴Baa tó ↄ̃ndↄ̃ↄ fↄ̃̀ àgↄ̃ dia, à kúkii zã̀, à asii bíta maamaa, dé bé eé fↄ̃ à bↄa?

²⁵Ma ↄ̃ndↄ̃ kↄ̃n yã píngio mì tàasi kɛ̀, má gwàgwa lɛ mà e mà dↄ̃, lɛ mà yãzaakɛna dↄ̃ yↄ̃nkↄkɛɛ ũ, lɛ mà yↄ̃nkↄkɛɛ dↄ̃ mìsaikɛɛ ũ.