LAASUUDEE 7:1-20 - Luda yã takada kↄ̃n Bokobaru yão

LAASUUDEE 7:1-20

Click on verse(s) to share them!

¹Tↄ́ nnaa maa dɛ nↄ́si gũ nna bɛ̀ɛdeela, gagurↄↄ maa dɛ igurↄↄla.

²Gɛ̃na ua kɛ̀ wèe gɛ̀ ↄ́ↄ dↄↄn maa dɛ gɛ̃na ua kɛ̀ wèe zĩbaa kɛɛnla, zaakɛ baade píngi yãanan gwe, à maa gbɛ̃ kɛ̀ aↄ̃ↄ kuunↄ yã pì da.

³Sósobikɛna maa dɛ yáadↄnala, pↄsiakɛna gbɛran nↄ̀sɛ è wee.

⁴Ɔ̃ndↄ̃dee làakari ègↄ̃ kú ua kɛ̀ wèe ↄ́ↄ dↄↄn-a, yↄ̃nkↄↄ làakari ègↄ̃ kú ua kɛ̀ wèe pↄnnaa kɛɛn-a.

⁵À maa ǹ ↄ̃ndↄ̃dee kpãkɛ̃nzina da dɛ ǹ swã kpá yↄ̃nkↄↄ gↄ̃ n tↄ́ kpaala,

⁶zaakɛ yↄ̃nkↄↄnↄ yáadↄↄ dɛ lán kyàkpa lí tɛ́pũtãna kĩi guu bàmɛ. Beee nɛ́ yã pãamɛ dↄ.

⁷Gbãa mↄna gbɛ̃nↄnɛ è tó ↄ̃ndↄ̃dee yↄ̃nkↄ kũmɛ, ↄdↄnkpɛɛgbaa è gbɛ̃ yakamɛ.

⁸Yã mìdɛna maa dɛ à daɛnala, mɛna maa dɛ ń zĩnda sɛna lezĩla.

⁹Ǹton tó ǹ pↄ fɛ̃ kpaaro, zaakɛ yↄ̃nkↄↄ bé ègↄ̃ pↄfɛ̃ vĩ.

¹⁰Ǹton be bↄ́yãnzin yãgurↄↄ maa dɛ tia pↄ́laro, zaakɛ yãlana beee taka nɛ́ ↄ̃ndↄ̃yãnlo.

¹¹Ɔ̃ndↄ̃ↄ nɛ́ pↄ́ maamɛ lán túbi bà, à àre vĩ gbɛ̃ kɛ̀ aↄ̃ↄe ↄfãntɛ̃ eenↄnɛ.

¹²Ɔ̃ndↄ̃ↄ nɛ́ utɛkiimɛ, lán ↄↄ dɛ utɛkii ũ nà, mↄde dↄ̃na àren yɛ̀: Ɔ̃ndↄ̃ↄ è gbɛ̃ kɛ̀ aↄ̃ↄ vĩinↄ wɛ̃̀ndi dãkpa.

¹³Ǹ laasuu lɛ́ Luda yãkɛnanↄa. Dé bé eé fↄ̃ à pↄ́ kɛ̀ à kɛ̀ kotina dↄdↄↄ?

¹⁴Tó gurↄ nnaa mↄ̀mma, ǹ pↄnnaa kɛo. Tó gurↄ zaaamɛ sↄ̃, ǹ laasuu lɛ́. Luda bé à à píngi kɛ̀, lɛ gbɛ̃ke tóngↄ̃ à ziaa dↄ̃ro yãnzi.

¹⁵Ma wɛ̃̀ndi kori kɛ̀ guu ma yã kɛ̀nↄ è píngi. Ma gbɛ̃ maaa è, à gà a maakɛna guu, ma gbɛ̃ zaaa è, èe gì kɛɛ a yãzaakɛna guu.

¹⁶Ǹton tó n maakɛna ↄ gɛ̃ro, ǹton tó n ↄ̃ndↄ̃ↄ ↄ gɛ̃ro. À kɛ̀ dia nɛ́ n zĩnda kaatɛɛ?

¹⁷N zaaa tón ↄ gɛ̃ro, ǹtongↄ̃ yↄ̃nkↄↄ ũro. À kɛ̀ dia nɛ́ ga n gurↄↄ ãa?

¹⁸À maa ǹgↄ̃ yã mɛ̀n plaaa pìnↄ kũnamɛ, ǹton ↄ kpáziro, zaakɛ gbɛ̃ kɛ̀ Luda vĩa vĩ è à plaaa pìnↄ zɛ́ e píngimɛ.

¹⁹Ɔ̃ndↄ̃ↄ è tó ↄ̃ndↄ̃dee gbãaa gↄ̃ dɛ wɛ́tɛ gbãade gↄ̃ↄn kurinↄla.

²⁰Gbɛ̃ maaa kɛ̀ ègↄ̃ yã maaa kɛɛ kɛ̀ è durun kɛroo kú anduna guuro.