LAASUNDE 7:16-26

¹⁶Ǹsun tó n manakɛna gɛ̃ ↄlaro, ǹsun tó n ↄ̃ndↄ̃ gɛ̃ ↄlaro. À kɛ̀ dera ĩni n zĩda kakatɛɛ?

¹⁷N vãni sún gɛ̃ ↄlaro, ǹsungↄ̃ yↄ̃nkↄ ũro. À kɛ̀ dera ĩni ga n gↄrↄ ãa?

¹⁸À mana ǹgↄ̃ yã mɛ̀n pla pìnↄ kũnamɛ, ǹsun ↄ gbarɛiro, zaakũ gbɛ̃ kũ à Luda vĩna vĩ dì a pla pìnↄ zɛ́ le pínkimɛ.

¹⁹Ɔ̃ndↄ̃ dì tó ↄ̃ndↄ̃ri gbãna gↄ̃ de wɛ́tɛ gbãnade gbɛ̃nↄn kurinↄla.

²⁰Gbɛ̃ mana kũ àdigↄ̃ yã mana kɛ kũ àdi durunna kɛro kú andunia gũnlo.

²¹Ǹsun sã kpá yã kũ gbɛ̃nↄ tɛn oi pínkiro, de ǹsun ma n zĩkɛri tɛni n sↄ̃sↄ̃ro.

²²Zaakũ ń dↄ̃ n zĩdanɛ, kũ mↄkↄ̃n se n gbɛ̃nↄ sↄ̃̀sↄ̃ dasi.

²³Ma yã birenↄ gwà kũ ↄ̃ndↄ̃o pínki, ma zɛo kũ mà ↄ̃ndↄ̃ kũ, akũ à zã̀ kũmao.

²⁴Bee tó ↄ̃ndↄ̃ fↄ̃̀ àgↄ̃ dera, a kúki zã̀, a asiri zↄ̃kↄ̃ manamana, dí mɛ́ ani fↄ̃ à boaa?

²⁵Ma ↄ̃ndↄ̃ kũ yã sĩnda pínkioo mìi tàasii kà, ma gwàgwa de mà le mà dↄ̃, de mà yãvãnikɛna dↄ̃ yↄ̃nkↄkɛ ũ, de mà yↄ̃nkↄkɛ dↄ̃ mìsarikɛ ũ.

²⁶Nↄgbɛ̃ kũ à de tankutɛ ũ a swɛ̃̀ bi gbàgidiimɛ a ↄnↄ bi mↄ̀kakↄ̃anaamɛ, a yã dì ma pↄ yaka de gala. Gbɛ̃ kũ a yã kà Ludanɛɛ dì wotoa, ama nↄgbɛ̃ pìi dì durunnakɛri kũmɛ.