2N lɛ́ súngↄ̃ wãnaro, ǹsun wã ǹ yã o Ludanɛro. Lákũ à kú musu ń kú zĩtɛ nà, ǹsun yã o dasiro.
3Lákũ yãbↄkↄtɛ dasi dì su kũ nana'onaao nà, lɛn yã dasi bↄtɛnaa dì su kũ yↄ̃nkↄyão lɛ.
4Tó n lɛ́ kɛ̀ Ludaa, ǹsun a fĩnabona gↄrↄ gágaro. Ǹ a fĩna bo, zaakũ yↄ̃nkↄnↄ yã dì kánɛro.
5Lɛ́kɛna Ludaa sari mana de n lɛ́ kɛ̀a papanaa sarila.
6Ǹsun tó n lɛ́ n da yãnlo. Ǹsun o sa'oriinɛ n pì n sã lɛ́kɛna yãnlo. Ń ye Luda pↄ fɛ̃nyĩ n yã pì yãi à zĩ kũ ntɛn kɛ kakatɛn yá?
7Nana dasi ona kũ yã dasi bↄtɛnaao dì su kũ yã pãomɛ. Abire yãi ǹgↄ̃ Luda vĩna vĩ.
8Tó n è òtɛn gbãna mↄ takasidenↄnɛ gukea, òtɛn gíńnɛ kũ yãzɛdeo òtɛn yã gↄ̃gↄ̃ńnɛ a zɛ́aro, ǹsun tó yã pì bo n sarɛro, zaakũ bùsuu pì gbãnadenↄ tɛn wɛ́ dↄkↄ̃i, akũ ń gbɛ̃ zↄ̃kↄ̃nↄ tɛn wɛ́ dↄńyĩ dↄ.
9Ń pínki dì bùsuu pì baka blemɛ, zaakũ kína mɛ́ à buranↄ vĩ.
10Gbɛ̃ kũ à ye ↄgↄↄi dì kĩaa, gbɛ̃ kũ à ye aruzɛkɛii àree dì mↄ́aro. Abirekũ pãmɛ dↄ.
11Tó aruzɛkɛ tɛn kara, a blèrinↄ dìgↄ̃ karamɛ. Bↄ́ àreen à vĩ a dikiriinɛɛ? À wɛ́ pitia baasiro.
12Zĩgbãnakɛrii dì i nna o à pↄ́ blè fítin yá ke dasin yá. Aruzɛkɛde sↄ̃ a pↄ́ dasi dì tó à i oro.
13Ma nɛ̀sɛyakana yã pãsĩ è andunia gũn, gbɛ̃ke zɛ́ tàta a ↄgↄdalɛ à a zĩda karii bò,
14akũ à bↄkↄtɛ vãni kɛ̀o, a aruzɛkɛ làka pínki. Kũ à nɛ́gↄ̃gbɛ̃ ì, à pↄ́ke vĩ kũ à tónɛro.
15Bisãsiri dì bo a da gbɛrɛn pótompomɛ. Lákũ à sù nà lɛn àdi ɛra à tá lɛ dↄ, àdi a zĩ àre ke le à sɛ́ à na a ↄĩ à táoro.
16Abirekũ bi nɛ̀sɛyakayã pãsĩmɛ dↄ. Lákũ gbɛ̃ sù nà lɛn àdi ɛra à tá lɛ dↄ. À ísimma wàra à pɛ̀ gukoria pã, bↄ́ mɛ́ à gↄ̃̀nɛɛ?
LAASUNDE 5
LAASUNDE 5:2-16