LAASUNDE 3:8-21

⁸Yenyĩ gↄrↄ kun, zãngu gↄrↄ kun, zĩ̀kana gↄrↄ kun, vutɛna aafia gↄrↄ kun.

⁹Bↄ́ àreen zĩkɛri dì le wari kũ à kɛ̀aa?

¹⁰Ma zĩ kũ Luda dà bisãsirinↄnɛ ò kɛ è.

¹¹Luda tò pↄ́ sĩnda pínki mana a gↄrↄa. À kunna gↄrↄ sĩnda pínki laasun dà bisãsiri swɛ̃̀n dↄ, bee kũ abireo ani fↄ̃ à yã kũ Luda tɛn kɛ zaa andunia naana ari a lakanaa dↄ̀rↄ dↄ̃ro.

¹²Má dↄ̃ kũ pↄ́ke mana kũ bisãsirio de kunna pↄnna gũn kũ manakɛnaao a wɛ̃̀ndi lɛ́nlaro.

¹³Tó gbɛ̃ tɛn pↄ́ ble àtɛn í mi àtɛni a zĩ sĩnda pínki sáabu kpá, Luda mɛ́ à a gbà.

¹⁴Má dↄ̃ kũ yã kũ Luda dì kɛ nigↄ̃ kun gↄrↄ sĩnda pínki. Oni fↄ̃ ò pↄ́ke karanlo, oni fↄ̃ ò pↄ́ke lagonlo. Luda kɛ̀ lɛ de ògↄ̃ a vĩna vĩ yãimɛ.

¹⁵Pↄ́ kũ à kun tera gĩnakɛ à kun zaa zĩ kↄ̀. Pↄ́ kũ anigↄ̃ kun zia kun yã kↄ̀. Luda dì yã kũ ò kɛ̀ yãnↄ gbɛ̀ sísi.

¹⁶Ma yã è andunia gũn dↄ, gu kũ à de yãzɛde gↄ̃ kún, yãzɛsaride mɛ́ à kú gwe, gu kũ à de yã mana gↄ̃ kun sↄ̃, yã vãni mɛ́ à kú gwe.

¹⁷Ma ò ma swɛ̃̀ɛ gũn, Luda ni yãkpatɛ kɛ kũ gbɛ̃ mananↄ kũ gbɛ̃ vãninↄ ń pínki, zaakũ yãkɛna sĩnda pínki kũ a gↄrↄomɛ, bↄkↄtɛ sĩnda pínki kũ a kɛgↄrↄo.

¹⁸Ma ò ma swɛ̃̀ɛ gũn dↄ, bisãsirinↄ sↄ̃, Luda dì ń yã wɛ́ wɛ̃ńnɛ de ò dↄ̃ ń zĩdaa kũ ò de lán nↄ̀bↄnↄ bàmɛ.

¹⁹Bee zaa zĩ bisãsirinↄ kũ nↄ̀bↄnↄ, gó dokↄ̃nↄ mɛ́ àtɛni ń bikũ. Lákũ nↄ̀bↄↄ dì ga nà lɛn bisãsiri dì ga lɛ se, ń we'ona dokↄ̃nↄmɛ. Bisãsiri de nↄ̀bↄlaro, zaakũ a pínki pãmɛ.

²⁰Ń pínki dì gɛ́ gu dokↄ̃nↄmmɛ, zaakũ ń pínki bò bùsutiti gũmmɛ, ń pínki ni ɛra à gↄ̃ bùsutiti ũmɛ.

²¹Tó bisãsiri nini dì tá musu, nↄ̀bↄ pↄ́ sↄ̃ àdi tá zĩtɛmɛ, dí mɛ́ à dↄ̃ↄ?