La Bilalaha 18:4-27

⁴Te la haro tabu tegite Iuda, eia ge vikara vikapopo legite Iuda, egite Grik tai, veia egite ge vulo la gabutatalala tegiteu tavu e Iesus.

⁵Goio, mulimuli e Sailas mira me Timoti, egira guvi loio e Masedonia, e Pol kamati gabutatala, eia lagu tavu moliti la valolo soio tegite Iuda veia egite ge rovia e Iesus eia e Kraist, la uru tegiteu.

⁶Eala moli egite Iuda goio muku pilea, egite vikara kukumuala. Tio e Pol hiloa mai ele, eia goio kuvali taro la momora te la lavalava tetala soio tegiteu, la irovilala la igototolola alele. Eia goio veia giteu mago “Mai amuto ge vilua te la igototolola te La Tahalo Uru, ale la iruru tamutou lou, eau ouka. Eau ge sele molia goio tegiteu ale souka matagaga, amuto Iuda korale!”

⁷Goio, e Pol hiliti taro egiteu ele, eia goio bula soio te la luma te la tau Grik isasa, la isala e Titias Iastas, eia la tahalo isasa eia lotu tavu sesele La Tahalo Uru, la luma tetala hagagavi moli te la luma la lotu tegite Iuda.

⁸Goio, la mulugaluga te la luma la lotu tegite Iudale, la isala e Krispas, eia lolo la vikararala te Pol, egite me la karakara tetala egite roromuliti la mererale, egite tomi vuloti la tia giteu tavu e Iesus, egiteu e Korin usu tai mai ele, egite tomi goio abi la vuluhi.

⁹Te la logo isasa, e Pol goio tabuliae moli la mulila, eia hilo la paga isasa eia mai ale tagea. La Uru sibitala tavua, eia veiala mago “Eme umala ge tataga la valolo, eme kama ge pou makovu,

¹⁰la vuhula eau omaiti taume. Isa kama ge igo gegerume, la vuhula omai te la mautu ale, la valalua usu rovitiau, egite taku.”

¹¹Eala e Pol goio mouti oio e Korin la leavala isasa la taio iuolo, eia tovo egiteu la merera te La Tahalo Uru.

¹²Eala moli goio te la leavala ale la mulugaluga te la gale Akaia ale egite Rom vipoua, la isala e Galio, eia goio guvi eia pou halaba te la igogolu tetala, te la imamalale egite Iuda goio soko vagari la vigimala soio te Pol, egite lapua soio te la vigagiala.

¹³Egite uleala mago “La tahalo ale, eia karasuku la valalua veia egite ge lotu te la vulovulo ale polo la viputumulila tamiteu.”

¹⁴Goio e Pol ga vikara, e Galio goio veia giteu la valalua e Iuda mago “Mai la iruru te la tahalo ale ge polo la viputumulila tamite Rom, ale eau ge lolo amutou.

¹⁵Eala moli ale amuto vaigo mulimuli la merera isahari oilo te la vulovulo mutou lou, ale la paga tamutou, amutou lou ge vimatatea.

¹⁶Eau kama ge loloa.” Tio eia vikara kaluvu mai ele, eia goio kumuli taro egiteu sogala.

¹⁷Egite mahelatio, egite gali sogala lao tola la mulugaluga te la luma la lotu tegite Iuda, la isala e Sostenes, egite kuea oio te la mata la luma la vigagialale, eala moli e Galio veia la golu bububu alele.

¹⁸E Pol goio mou tabaa lou bakisi oio e Korin, mulimuli eia goio tataro egiteu la valalua la lotu, eia tuga golau e Senkria, eia goio sipa taro tomi la ivula, mulimuli eia goio sae te sipi, e sipi vaharia somuli lou e Siria, e Prisila mira me Kuila tilimuli taia. Ale eia sipa taro la ivula, la vuhula eia toiti la merera ale tikumu soata te La Tahalo Uru, me ale la irovilala ovola alele.

¹⁹Goio, egite guvi omuli la mautu Epesas, e Pol goio tuga taro egirua oio te la mautu alele, eia goio goilo lou te la luma la lotu tegite Iuda, eia vikara vikapopo legiteue.

²⁰Egite goio kakea veia eia ge pou tabaa bakisi oio tegiteu, eia kama masaga.

²¹Eala moli eia tataro egiteu, eia goio veia giteu mago “Mai La Tahalo Uru ge masagea, eau ge beu loua somai tamutou.”

²²Goio, eia sae te sipi, eia hiliti taro la mautu Epesas ele, tugatio. E sipi goio goilo e Sisaria, eia sivo, goata e Ierusalem, eia goio laharoa giteu la valalua la lotu, eia goio pou bakisi, mulimuli eia goio sele molia soio e Antiok, poutio.

²³Tio, e Pol goio pou tabaa muga bakisi oio la mautu e Antiok ele, mulimuli eia goio soko la tuluga lou, polo kabili te la gale Galesia, e Prisia tai, eia viteteli egiteu la valalua la lotu tomi oio te la gale iluale.

²⁴Te la imamala alele, la tau Iuda isasa, la isala e Apolos, la mautu tetala sesele e Aleksandria, eia guvi oio Epesas. Eia la tahalo isasa la merera tetala taritigi, eia rovi tomi tai la merera La Buk Tabu Ale Pala tegite Iuda.

²⁵La valalua la lotu pala tovo tigi leia la gauru te Iesus, eia vagari tavu moli la valolo soio te la valalua me hatavivile, la igogolu tomi te Iesus eia rovi molia, eia ka ruru, eala moli eia rovi moli la vuluhi te Ioanes, la vuluhi te la isale Iesus eia ka rovia.

²⁶Eia goio valolo vagari te la luma la lotu tegite Iuda. E Prisila me Kuila goio lolo la valolo tetalale, egira goio pulia, egira goio vituriala la gauru tomi te La Tahalo Uru ale eia soukama matagaga ovola.

²⁷E Apolos loloa, eia veia eia taritigi, eia goio veia ge goio la gale tegite Grik e Akaia ge valolo te la gale alele. Tio egiteu la valalua la lotu oio Epesas, egite veia ge sulia, egite kekesi matagaga soio tegiteu e tabarabara giteu la valalua la lotu oio e Akaia veia e Apolos ge guvi, egite ge rara tavua, ge pulia soio te la luma tegiteu. Tio e Apolos goio guvi oio te la mautu tegiteu ele, egite puhi tataho molia, me eia goio suli tataho egiteu tomi la valalua ale sau tola la gilogo te La Tahalo Uru veia ge tetala.