La Bilalaha 14:11-22

¹¹Tio egite la valalua me hatavivile tomi hiloa mai ele, egite karutu, egite goio tolatio te la merera e Likionia mago “Hilage, la uru ilua ale loata te la mori sibitalati mai la tahalo, egira guviti otalo tegatoue.”

¹²Egite goio toi lou la isale Banabas veia e Seus, tio e Pol, eia mamuga la vigagiala tegirua, eala egite goio toila e Hermes, mai la isa la uru tegiteu ele ale egite lotu tatavua.

¹³Me oio la mautu alele, la luma la lotu te Seus eia magiri oio la gilesu la mautu, me egiteu ale vibaumuli te la luma alele, egite tokoromo isahari la kau la purupuru, vahari egiteu sogala la matapiro, veia ge bilia, ge gutua, la sosobu ge goata la mori mai la vulovulo giteu te la tilogo la uru tegiteu te la lotu tegiteu.

¹⁴Eala moli egira la bilalaha iluale, e Pol me Banabas, egira goio lolotia la merera aleie, la hate girua mamasi, egira goio silea la kairobola tegiruale, egira hari soio te la lolo la valalua me hatavivile, egira koho tavu egiteu mago

¹⁵“Amuto la valalua, ilava amuto gabutatala maie te la tia mutou ele? Amilua la tahalo moli, mai moli amutoue, etato isauru molie, eala moli la igogolu tamilua te la veipala la valolo ale taritigi te La Tahalo Uru soio tamutou veia amuto ge loloa, amuto ge vulo la gabutatalala tamutou, ge piligi taro la iruru tamutou, veia amuto ge rovi sesele La Tahalo Uru, amuto ge pou hagagavi tetala. Amuto oukati ge lotu te la lotu la visigolola. Amuto ge rovi La Tahalo Uru Ale Sesele, eia vipou la mori oata, la magasa otalo, me la mago olau, me la papaga tomi ovola.”

¹⁶Egira goio vei loua giteu la valalua mago “Eia sesele, pala La Tahalo Uru mata sosoli moli la maratatila la valalua me hatavivile tomi mai ele, egite tilimuli moli la gabutatalala tegiteu te la vulovulo giteu isapolopolo te la galegale tomi, eala moli La Tahalo Uru kama pou kokovu sesele veia amuto kama ge rovia, ouka.

¹⁷La Tahalo Uru, eia suli etatou tomi, eia pou oata te la ilo la lage, eia sugu taro la hura sotalo te la valalua tomi, me la ilali tomi ale kusi otalo te la magasa, egite tau la vavua giteu, La Tahalo Uru moli eia la vuhula, me la ilali tomi egite vua, la valalua egite olia, alia, egite sagege ovola.”

¹⁸E Pol me Banabas, egira veia giteu la valalua maie, eala moli egira geho sesele la mera taro la valalua veia egite umala ge rou la kau tegiteu soio tegirua.

¹⁹Eala moli egiteu e Iuda isahari ale loio e Antiok me Aikoniam, egite goio sibitala, egite ali la ilo la valalua tomi, tio la valalua goio dumu le Pol la uati, eia goio peho. Egite goio lave molia la pileleholale, lapua sogala la matapiro, egite veia eia peho seseleti.

²⁰Goio, egiteu la valalua la lotu te Iesus, egite goio sibitala, magiri, egite goio malele roboa, eia goio mahuli rivu lou, eia goio goluma lou te la mautu, tio goio mai galigeli, egira me Banabas, egira gomuli la mautu uru e Derbe.

²¹Egira valolo la valalua te la valolo ale taritigi oio te la mautu ale uru ele, egira goio puli la valalua usu, egite goilo te la lotu te Iesus. Tio, mulimuli, egira goio beu rivua soale la mautu uru e Listra, goilo e Aikoniam, goale lou e Antiok.

²²Ale egira guvi rivu lou oale e Antiok, egira goio tutu tola vagari loua giteu la valalua la lotu te Iesus. Mai ele egira viteteli vagari lou egiteu mago “Etato tomi masagea ge goilo la mautu la marokala te La Tahalo Uru, eala moli etato ge poga pala muga la iligiligi ale usu pepeho.”