La Bilalaha 13:17-38

¹⁷La Tahalo Uru tamiteu la valalua e Israel, eia hiloviti egiteu e tutubu miteu, ale pala egite pou la mosi oio la gale Gipto, eia hilovi egiteu veia eia ge La Uru tegiteu. Eia suli egiteu, egite goio sili usu pepeho, mulimuli te la vagagarila ale uru eia goio lapu taro egiteu sogala te la mautu la viligilale.

¹⁸Egite pou la mosi oio te la hohoi la leavala savulu vaa, eala moli La Tahalo Uru baumuli moli egiteu.

¹⁹Oio te la gale Kenan, la karakara ivitu, egite luliti, La Tahalo Uru sulu tomiti egiteu, la magasa tegiteu ele, eia sugu tarotia giteu e Israel, egite mouti ovola la leavala salatu vaa savulu lima.

²⁰Mulimuli La Tahalo Uru abia giteu la mulugaluga isahari ale baumuli egiteu la merera ale taritigi tetala, igo moli maie kara te la imamala te Samuel.

²¹Goio, mulimuli ovola, egite veiale Samuel veia eia ge toia giteu isasa la mulugaluga mai e king, goio, egite kaka tavu La Tahalo Uru, La Tahalo Uru goio sugu taroa giteu e latule Kis, la isala e Sol, eia loio tegiteu la karakara te Beniamin, eia mamugea giteu.

²²La leavala savulu vaa polo, La Tahalo Uru goio barautu la viputumulila te Sol ele, eia goio vipou loua e Devit ele, eia ge la mulugaluga tegiteu. La Tahalo Uru goio vei mulia giteu la valalua e Devit ele, mago ‘Eau hiloviti la tahalo ale e Devit, e tamala e Iesi, eau masaga pasia. La vuhula eau rovitia, eia ge tilimuli sesele la igogolu taku tomi.’

²³Ale La Tahalo Uru veia giteu mai ele, la vuhula eia toi palatia alaurati veia La Riau tetala eia ge sibitala loio tegiteu la hilile Devit. Eala, igoie, La Tahalo Uru vahilititi e Iesus, eia ge vimahuli la valalua e Israel, mai sesele ale pala eia veitia.

²⁴Ale pala e Iesus souka sibitala, te la tahu moli alele, e Ioanes moli valolo la valalua e Israel te la merera te La Tahalo Uru, egite loloa la valolo te Ioanes mai ele, la tia giteu goio vuvulo, e Ioanes vuhi egiteu.

²⁵Tio ale eia hagagaviti veia e Ioanes ge vikaluvu la igogolu tetala, eia goio veia giteu mago ‘Amuto veia eiau ere? Eau kama la tahalo ale amuto pou taitaliale. Amuto ge loloa, la tahalo isasa, eia ge mulimuli taku, eia uru, te la milatalata tetala eau soioge la tahalo bulalahu moli.’”

²⁶Tio, e Pol goio vikara lou soio te la valalua mago “Amuto e tabarabaragu, amuto e tutubule Abraham ele, me amuto tai la valalua logala ale amuto lotu tavu La Tahalo Uru, etato ge rovia, la valolo ale taritigi ele, eia koramuli etatou tomi.

²⁷Egiteu tomi la valalua e Israel, me egiteu tai la mulugaluga tegiteu, egite tomi rovi tigia la tahalo aleie. Eala moli egite kama gabutatala tigia la merera tegiteu la bilalaha ale pala ale etato lolo bibibia te la luma la lotu. Egite tilimuli seselea la vulovulo ale kama kokora, mai ale egite la bilalaha valolotila alaura.

²⁸La tahalo ale e Iesus, eia kama igo isasa la iruru, eala moli la valalua gimea. Egite lapu bubu molia soio te Pailat, veia e Pailat ge bili taroa, eala moli eia la iruru ouka.

²⁹“Tio, goio, la valolo tomi ale egite la bilalaha veipalatia alaurao, kara igoie, e Iesus goio pogatia, la vikararala tomi ele puruti, ale egite katu tolea oata te la tauvalautu, eia peho. Goio egite visivoa loata te la tauvalautu, egite goio ulaia.

³⁰Eala moli La Tahalo Uru goio vahiliti loua e Iesus ele lotalo la lulu la pileho.

³¹Goio, egite la valalua ale tilimulimulia loio e Galilea, goio e Ierusalem, egite la valalua tetalale, la haro usu egite hilo e Iesus, ale eia mahuli rivuti lou, me kara te igoie egite valololo amiteu la valalua e Iuda ovola.”

³²E Pol valolo egiteu mai ele, eia goio lapu lou la merera tetala soio tegiteu mago “Eala, igoie, amila guviti omai tamutou veia ge vei matagagea mutou la valolo ale taritigi. La Tahalo Uru tauti la tilau tetalale soio te tutubu miteu,

³³eala moli igoie la merera tetala eia puruti tegatou la tuvu ale mulimuli, ale amite hilotia La Tahalo Uru vahiliti e Iesus taro la lulu la pileho, mai La Buk Tabu Ale Pala, la bilau te Devit, eia toitia maie ‘Eme e latugu, igoie eau vauru la isamu.’

³⁴La Tahalo Uru toia mai ele, la vuhula eia vahilitia lotalo la lulu la pileho, eia kamati ge peho lou ge parara otalo la lulu. Ale tai La Tahalo Uru toitia pala mago ‘La vibalavala ale eau veia ge abiale Devit, eia ge puru omai taume, e tubula.’

³⁵Me la merera isa lou tai te La Buk Tabu Ale Pala, eia veia maie ‘Eme kama ge taro molia La Riau taume veia la vovola ge parara otalo te la lulu la pileho.’

³⁶Tio me oilo vola etato rovia, e Devit, eia sau tola la igogolu te La Tahalo Uru, eia tilimuli sesele la masasagala te La Tahalo Uru, kabili te la valalua, te la imamala tetalale. Mai mulimuli la vitabarila te la igogolu te La Tahalo Uru soio te Devit kaluvuti, la leavala koramuliti eia ge peho, eia goio peho seseleti, egite goio ulaia te la balile tamala me tutubula, la vovola parara seseleti otalo la magasa.

³⁷Eala moli la tahalo ale e Iesus, La Tahalo Uru vahilitia lotalo la lulu la pileho, la vovola kama parara.

³⁸Taritigi amuto e tabarabaragu, etato ge rovi tigia, amite valolo matagagati le amutou te la pilehole Iesus, eia moli visibitala la valolo ale taritigi ale La Tahalo Uru ge sabubu taro la iruru tamutou. La viputumulila te Moses, eia kama koramulia ge vimahuli amutou, veia amuto ge maroka, ouka sesele. Eala moli la pilehole Iesus moli, eia koramulia ge sabubu taro la iruru te la valalua tomi ale egite roromulia, egite ge maroka.