Làasoode 7:12-27

¹²Ɔ̃nↄá kpanziɛɛ, lá ↄ̃a dɛ kpanziɛ ũwa, mɛ́ dↄ̃a àin kɛ: Ɔ̃nↄnaↄ ↄ̃nↄ ì ń misi.

¹³Làasookɛ Lua yãkɛaↄwa. Démɛ a fↄ̃ pↄ́ pↄ́ a kɛ̀ kolea pooi?

¹⁴Tó gↄↄ na mↄ̀ma, pↄnakɛò. Tó gↄↄ vãiɛ sↄ̃, làasookɛ, Lua mɛ́ kɛ̀ píi, kɛ́ gbɛ̃e su àↄ a zia dↄ̃o yã́i.

¹⁵Ma wɛ̃ni giiɛ bee guu ma yã́ɛ beeↄ è píi. Ma gbɛ̃maa è à gà a maakɛa guu, mɛ́ ma gbɛ̃vãi è àlɛ gɛ̃gɛ̃ a yãvãikɛa guu.

¹⁶Ńsu to n maakɛa gɛ̃agɛ̃o, ńsu to n ↄ̃nↄ gɛ̃agɛ̃o. Bↄ́yãi ńyↄ̃ yã́yia nzĩawai?

¹⁷N vãi su gɛ̃agɛ̃o, ńsu ǹyↄ̃ sↄũo. Bↄ́yãi ńyↄ̃ ga kpóoi?

¹⁸A maa ǹyↄ̃ yã́ mɛ̀n plapiↄ kũaɛ, ńsu ↄkpaio, asa gbɛ̃́ pↄ́ Lua vĩa vĩ ì yã́piↄ zɛ́ e píiɛ.

¹⁹Ɔ̃nↄ ì to ↄ̃nↄna gbãa àↄ dɛ wɛ̃́lɛ gbãade gbɛ̃ↄn kwiↄla.

²⁰Gbɛ̃maa pↄ́ ìↄ yãmaakɛ mɛ́ ìli duunakɛo ku dṹniauo.

²¹Ńsu swã́sɛ yã́ pↄ́ wàlɛ ozi píio, kɛ́ tó n zĩkɛna lɛ́ n ká, ńsu mao yã́i.

²²Asa ń dↄ̃ nzĩawa, kɛ́ mpi sↄ̃ n gbɛ̃́ↄ kà dasi.

²³Ma wɛtɛ̀ yã́ beeↄi ↄ̃nↄ'ↄ̃nↄ píi, ma mɛ̀ má ↄ̃nↄkũ, ↄ̃ à zã̀kũmanↄ.

²⁴Ɔ̃nↄ kúkĩi zã̀, a asii zↄ̃ↄ maamaaɛ, démɛ a fↄ̃ bↄwài?

²⁵Ma ↄ̃nↄ ń yã́pii mio tàasikà, má yↄ̀ɛ kɛ́ mà e dↄ̃, mí yãvãikɛa dↄ̃ sↄũkɛ ũ, mí sↄũkɛ dↄ̃ mìsaikɛ ũ.

²⁶Má è nↄɛ pↄ́ dɛ bai ũ, aà sↄ̃á mↄmusunaɛ, mɛ́ aà ↄↄá mↄdaonaɛ, aà yã́ ì ma pↄ ya dɛ gaa. Gbɛ̃́ pↄ́ a yã́ kà Luagu ì pili nↄɛpiwa, ãma nↄɛpi ì duunkɛna kũɛ.

²⁷Mámɛmaa Làasoode ma mɛ̀: Yã́ pↄ́ ma bↄwà gwa. Kɛ́ málɛ yã́ gwa zɛ́zɛ mà e a midↄ̃,