Lɛnʋgbʋnya 2:15-34

¹⁵Sa a pʋpalɩa dɛ we 'wlukʋʋn la, we 'nɩ 'sa -mɩ. Nʋ 'nɩ nyɩma nɩ 'bhada -mɩ, nɩɩ, zlʋkpa -lɛlɩ gbomnʋanʋ 'wʋ -a mɩa da.

¹⁶Nɩɩ, -we *-Lagɔgbʋʋ -falɩpanyɔ -Zowɛlɩ gbaa, mʋ mɩa -slɛɛn da lɛnʋda. Ɔ nɛɛ nɩɩ, -Lagɔ nɛɛ:

¹⁷‹-We 'kaa lɛnʋ 'wʋbhlolu -ylɩnyaa zlɩ mʋ nɩ. Na Zuzu na yia nyɩma weee -gʋ lamnenia. Amɩaa nʋkpasiyua -yɔ amɩaa 'ŋwnɩyua yia gbʋʋ -falɩ 'paa. Amɩaa nyimesia yia -li -yɔyɩa wa 'yli 'wʋ, 'ɩn amɩaa nyɩsʋɩ 'ka 'ylaanya yla.

¹⁸Cɩɩn, wee 'ylɩnya -mɩnɩ nya, na Zuzu na yia na lubhonʋnya -yɔ na lubhonʋŋwnɩ -gʋ slua, 'ɩn wa 'ka gbʋʋ -falɩ 'pa.

¹⁹Gbʋ 'kadɩ na yia lɛnʋa yalɩ. 'Ɩn ɩn 'ka gwɛdigbʋ lɛnʋ dʋdʋ -gʋ. 'Pɩɔn klaa, -kosu klaa, gbeylo -ylukpa klaa, mʋ -wa.

²⁰Nikpise yia 'ylʋ 'yliya 'wʋ kpaa, 'ɩn 'cʋ 'ka zamanɩ nɛɛ 'pɩɔn. -Mʋʋ 'bɩgʋ, 'bhie, Nyɩmaa -Kanyɔɔ yiyiylɩ 'kadʋ ka 'ŋnɩmnɩa 'kaa yi.

²¹'Ɩn nyɔɔo nyɔɔ -ka Nyɩmaa -Kanyɔɔ 'ŋnɩ la, -Lagɔ 'ka ɔ gbʋ 'wʋsa.› »

²²Piɛlɩ nɛɛ 'yaɛ: «Izlaɛlɩɩ nyɩma, -we na yia aɩn -yla gbaa, a pʋlʋ we yukwli: -Lagɔ ka Nazalɛtɩyu -Zezuu 'tɩtɛ aɩn 'klʋslolu. -Zezuu gbɛgbɛɩn -Lagɔ nʋa ninee 'ŋnɩpalɩgbʋ klaa, gbʋ 'kadɩ klaa, we -yɔ gwɛdigbʋ lɛ aɩn nyɩdɩ. Amɩaa 'dɛ -yi we 'ji.

²³Wa 'kaa aɩn -Zezu yoo 'nyɛ -Lagɔ -yi we 'ji, 'ɩn ɔ dʋmagbʋ -wa, ɔ ka we 'wlukʋʋn lapʋpalɩ 'cɩn. A ka -Zezu 'bha, a ka ɔ gbʋnyuu -lɛnʋnya yoo 'nyɛ, 'ɩn wa yia ɔ *su -gʋ lakʋlʋ.

²⁴-Lagɔ ka -Zezu 'wʋbhu tlɩtlɩe lʋ, 'ɩn ɔ yia ɔ tlɩtlɩee sɩasɩee 'llukpe -yɔdɩ, we se 'nɩ -mɩ, ɔ 'ka tlɩtlɩee 'tɩtɛ zɔ -tʋ.

²⁵Nyɩmaa 'wlulapɩlɩnyɔ -Davidɩ nɛɛ -Zezu daaɛ: ‹'Kɔmʋʋ na yɩa Nyɩmaa -Kanyɔ -yɔ na 'dɛ 'yu. Ɔ mɩ na lilisɔlʋ, ɩn yi bhlii 'gbʋ.

²⁶We 'gbʋ, na dlɩ 'wlʋ gumu, 'ɩn na ŋwɛɛ wɛlɩ mɩ yeda 'mʋna nya. 'Ɩn na ku -ka tlɩ, -zugba nyapɛda we mɩa: na dlɩ 'tɛ 'wʋ -Lagɔ -gʋ.

²⁷Nɩɩ, na -kanyɔ, -ɩn 'na 'ka 'mɩ tlɩtlɩe lʋtɩ tlɩtlɩnyaa dʋdʋ -gʋ. -Ɩn 'na 'ka -na -mɔwlʋnyɔ 'yitide ɔ 'ka 'bhʋka 'wʋ zɛnɩ.

²⁸-Ɩn ka 'mɩ 'yliyɔgagɩe -we 'nɩa bhloluda -kaa 'yoo daslolu. Ɩn -ka -mɩ 'yu -mɩ, 'mʋna -na yia 'mɩ yelia.› »

²⁹Piɛlɩ nɛɛ 'yaɛ: «Na bhelia, amɩaa zukpa -wa, a 'nyɛ 'mɩ 'yoo, ɩn 'ka -amɩaa dʋkpasa -Davidɩɩ -gʋgbʋ gba kpɛɛn kpɛɛn. Ɔ ka tlɩ, wa ka ɔ 'bhlu. 'Ɩn ɔ gbawla mɩ -zɛɛn ylɩ nya -aɩn nyɩdɩ.

³⁰Bhla -we nya, nyɩmaa 'wlulapɩlɩnyɔ -Davidɩ -gaa 'yliyɔ nɩ, ɔ mɩ -Lagɔgbʋʋ -falɩpanyɔ nya. 'Ɩn ɔ -yi we 'ji, -Lagɔ ka ɔ -yla bi: nɩɩ, ɔ 'yuoyu -kpɔ yia ɔ 'ŋnɩmnɩbɩ 'wʋbhua.

³¹Nyɩmaa 'wlulapɩlɩnyɔ -Davidɩ ka we -yɔyɩ -mɔ 'yugbɛɩn nɩɩ, *Klisɩ, -Lagɔɔ -Bhasanyɔ yia 'wʋsɔa tlɩtlɩe lʋ. We 'gbʋ, ɔ nɛɛ nɩɩ, -Lagɔ 'nɩa ɔ tlɩtlɩnyaa dʋdʋ -gʋ 'wʋbanɩa yi. 'Ɩn ɔ ku 'na 'ka zɛn gbawla nʋkplɛ.

³²Ɔɔ -Zezu, -ɔ ka gbʋ ɩn mɩa da gbada, -Lagɔ ka ɔ 'wʋbhu tlɩtlɩe lʋ, -amɩa -mama mɩa da, -a 'dɛ weee mɩ we -bhayɩnya nya.

³³-Lagɔ ka ɔ 'wʋbhu ɔ lilisɔlʋ, 'ɩn ɔ yia Zuzu 'Pʋpa 'yɩ, -ɔ Dide -Lagɔ gbaa zlɩmɛ ɔ 'ka yoo 'pa. 'Ɩn ɔ yia ɔ Zuzu -aɩn -gʋ slu, 'mʋ a mɩa -yɔyɩda, 'ɩn 'mʋ a mɩa 'nʋda -slɛɛn.

³⁴Nɩɩ, nyɩmaa 'wlulapɩlɩnyɔ -Davidɩ 'nɩ cɩ yalɩ mnɩ, 'ɩn ɔ nɛɛ ɔ 'dɛ nyaɛ: ‹Jejitapɛ nɛɛ na -Kanyɔ -ylaɛ: «-Ɩn -dɩ na lilisɔlʋ la, 'ɩn ɩn 'ka -na tʋnyɩma -na bhʋ zɔ lapalɩ, -ɩn 'ka wa -gʋ nɔ.» ›