Lɛnʋgbʋnya 28:24-30

²⁴Gbʋ ɔ mɩa gbada, we ka -zakpa -bhlo lu, 'ɩn tɔlʋa nɛɛ -maa 'nɩa we -yɔŋwnu.

²⁵'Ɩn wa mɩ kpɛlɩda, -zugba wa mnɩ. Pɔlʋ nɛɛ wa -yla bheɛ: «Zuzu 'Pʋpa ka zlɩmɛ zukpa, da ɔ gbaa amɩaa dʋkpasɩ -yla gbʋ -Lagɔgbʋʋ -falɩpanyɔ Ezaiii ŋwɛ nya! Ɔ nɛɛ nɩɩ:

²⁶‹-Ɩn mnɩ, -ɩn gba nyɩma nɩ -ylaɛ: «Gbʋnya a yia 'nʋa sa 'nanʋʋ, 'ɩn a 'na 'ka we 'ji 'wʋlanʋ. -Li a yia ylaa sa 'nanʋʋ, 'ɩn a 'na 'ka we -yɔyɩ.»

²⁷Cɩɩn, waa nyɩma -manɩ ka wa dlɩ 'tɛmanɩ, wa ka wa yukwli 'wʋsulu, 'ɩn wa yia wa 'yli 'mu. Wa yi layɩ wa 'yli nya, wa yi 'nʋ wa yukwli nya, 'ɩn wa yi gbʋ 'wʋlanʋ wa dlɩ nya. Wa 'nɩ 'yɩbha wa 'ka na -gbɛ lʋbhiti, ɩn 'ka wa pue.› »

²⁸'Ɩn Pɔlʋ yi 'yaa we -gʋdɩɛ: «A yibheli we 'ji nɩɩ, nyɩma -wa 'nɩa Zuifʋ, -Lagɔ ka wa nyɩmaa gbʋwʋsawɛlɩ yoo 'pa. 'Nʋa -maa yia we.»

²⁹Da Pɔlʋ gbaa wɛlɩnya -mɩnɩ, Zuifʋ -yɔ kpɛlɩkpɛlɩe 'tɩtɛ yia mnɩ wa 'dɛkpʋa nyɩdɩ.

³⁰-Budu -we Pɔlʋ 'pɛnɩa, ɔ li we zɔ zʋ 'sɔ, 'ɩn -wa weee yia ɔ 'yɩa wee -budu zɔ, sɔ 'sɔ nya ɔ kpaa wa.