Ləmɑɣɑsɛɛ tʋ 5:12-19

¹²Yɑɑsi ɩsɑɣɑʋ nɔɣɔlʋɣʋ mɑ nɑwɑ tɛtʋ tɔɔ, ɩnəɣəlɛ ɩsənɑ yʋlʋ sɩɩkʋɣʋ liɣitee nɑ ɑ́ tɑɣɑnɩ ɩ mɑɣɑmɑɣɑ kɛ́ wɑkəlʋɣʋ tɔ.

¹³Ye ɩ nyʋɣʋ səpɑ nɑ ɩ liɣitee ɑnɩ ɑ́ sɑɑlɩ, ye ɩ lʋlɑ ɑpɑlʋpəyɑɣɑ, niŋ kpɛtɛ kɛ kɛlɛ kɑ kɔŋ.

¹⁴Ɩsɩɩ ɩ too kɑ lʋlʋɣʋ-ɩ kpɛtɛ tɔ, ḿpʋ́ɣʋ́ ɩ kɑ́ sɩ kpɛtɛ tɔtɔ, ɩ kɑɑ tɔkɩ ɩ təmlɛ pʋlʋɣʋ ɩ niŋ tɑɑ.

¹⁵Sɩ yʋlʋ ɩ́ sɩ kpɛtɛ ɩsɩɩ ɩ kɑ́ kɔm tɔ pə kɛ́ lɑŋwɑkəllɛ sɔsɔɔlɛ kɛ́. Ɩ təmlɛ tɔm lɑpɑ kɑtɛ kɛ́, kɑwɑɑɣɑ fɛɩ tə tɑɑ.

¹⁶Səkpɛtʋɣʋ, nɑ lɑŋwɑkəllɛ, nɑ nəɣəsɛɛ tuutuumɑ, nɑ kʋtɔməŋ, nɑ pɑ́ɑ́nɑ́ tɑɑ kɛ́ ɩ wɛɛ, hɑlənɑ ɩ səm.

¹⁷Ḿpʋ́ɣʋ́ ləmɑɣɑsɛɛ tʋ tɔmɑ sɩ: Nti mɑ nɑwɑ tɔɣɔlɛ sɩ yʋlʋ lɑŋlɛ ɩ́ hʋləmənɑ ɩ kʋtɔɣɔʋ, nɑ ɩ kʋnyɔnyɔɔm, nɑ ɩ təmɑ tənɑ nnɑ ɩ lɑkɩ ɑtɛ tɔ, hɑlənɑ ɩ səm. Mpi tɔ, ɩ pɑɑ tete ntɛ́ tənɑ.

¹⁸Mpɑ pɑ tənɑ Ɩsɔ hɑɑkɩ toŋ nɑ wɛnɑʋ sɩ pə kɛ́ pɑ nyəm nɑ ɩ yeki-wɛ sɩ pɑ́ tɔɣɔ nɑ pɑ́ yɔɔlənɑ pɑ təmlɛ tɔ. Mpʋ ɩnɩ pə kɛ́ Ɩsɔ kʋcɔɔʋ kɛ́.

¹⁹Mpi pə tɔɔ tɔ, sɑɑ wei Ɩsɔ tʋɣɩ yʋlʋ tɑɑ kɛ́ lɑŋhʋlʋmlɛ tɔ, ɩɩ pɑɑsəɣənɑ teu sɩ ɩ weesuɣu topilɑɑ.