Ləmɑɣɑsɛɛ tʋ 10:7-17

⁷Mɑ nɑwɑ yomɑɑ cɑɣɑ kpɑɣɑnəŋ nɑ ɑwulumpiyɑ nɑ́ɑ́ tɔŋ nɔɔhɛɛ ɩsɩɩ yomɑɑ.

⁸Ye wei ɩ hulɑ pʋ́ʋ́ɣʋ́ ɩ hotiɣi kʋ tɑɑ kɛ́, ɩlɛnɑ tʋm nyɑsɑ wei ɩ cɑɑtəɣɩ koluŋɑ tɔ.

⁹Ye wei ɩ lɑkɩ təmlɛ kɛ pɛɛ təyɔkəlɛ ɑ kʋɣɩ-ɩ kɛ́, ɩlɛnɑ tɑɑsɩ fɑɣɑlʋ nɑ́ɑ́ wɛ ɑsolɑ tɑɑ.

¹⁰Ye lɑɑlɛ timɑ nɑ pɑ́ tɑ sɑlɑ-tɛ, ketulu kɛ pə nɩɩkɩ tɔm nɑɑlɛ. Amɑ ləmɑɣɑsɛɛ yekinɑ nɑ yʋlʋ wɑɑ.

¹¹Ye tʋm nyɑsɑ ɩ tʋ wɑɑtʋ ɩnɩ tʋm tʋ ɩnɩ ɩ tɑ́ wɑɑ tʋmɑɑ tɔɔʋ tɑɑ kɛlɛ.

¹²Yəlɑɑ cɑɑkɩ ləmɑɣɑsɛɛ tʋ kʋyɔɣɔtʋtʋ kɛ́. Ɩlɛnɑ nyʋɣʋfɛɩ tʋ kʋyɔɣɔtʋtʋ nɑ́ɑ́ wɑkələɣɩ-ɩ.

¹³Kʋmɛlətɔm kɛ ɩ cɑɑləɣənɑ, ɩlɛnɑ ɩ́ təkənɑ kpɑŋʋɣʋ nyəntʋ.

¹⁴Nyʋɣʋfɛɩ tʋ lʋləsəɣɩ kʋyɔɣɔtʋtʋ kɛ́. Yʋlʋ tɑ nyɩ mpi pɩɩ kɔɔ tɔ. Awe kɑ́ kɛɛsɩ-ɩ mpi pɩɩ tɛ nɑ pə́ lɑ ɩ səm wɑɑlɩ tɔ?

¹⁵Nyʋɣʋfɛɩ tʋ kɑɑkənɑ ɩ təmlɛ kɛ́. Ɩɩ tɩɩ nyəŋ nɑ ɩ́ polo ɩcɑtɛ tɑɑ.

¹⁶Ye tɛtʋ wɛnɑ wulɑʋ ɩwɑɑsəlɛ nɑ ɩ wɑɑlɩ nyə́mɑ təmlɛ ntɛ́ hiluɣu tike, tɛtʋ ntɩ tə tɔm wɛ wɑɩyo kɛ́.

¹⁷Tɛtʋ nti tə nɩɩ leleŋ tɔɣɔlɛ nti tə wulɑʋ kɛ́ kɑsɑɣɑmpu nɑ ɩ wɑɑlɩ nyə́mɑ tɔkɩ pɑ tɔɣɔnɑɣɑ kɛ kɑ wɑɑtʋ sɩ pɑ́ hiki tomɑ, pə tɑɣɑ ɑcimɑ tɔ.