Kolesaga Koneai Bidigo Pusali Po Elalubo Buku 8:1-9

¹Te kolesaga page mu konea pali bidigo naga te mena ebo page mu koneaibao. Tialima, dego mu te kolesaga page mu koneai bidi aiyaba elalueibawe? Te bidigo gesabi hulia sobaso da, teda wiegi yai homu kolesaga igulubaso, te aga gesabidi ula ma ebo dao.

²Eno te tama po obao, nago te kingo po wali pao. Nago te Godigo gedude te bomai po dąų waliyu, nago te kingo wabo po wali paibao po wai dao. Nago te bomai po dąų wali te homu kone palama, tama nago te kingo po me sela sąnamu dao.

³Nage te king dali bidibaso da, teda nago asesa polo te king tagaligio. Te nago king dali po konila obaso da, teda nago bomo elama mu wagio, magi baso meni, king aga digi aga homu wali pabo dao.

⁴Te kingo mena po me obaso da, teda tigidali bidigo te po wali pabo dao. Te niwai bidi deligo agabolo me hanalugobeo, “Magi baso nago te tiwai yaibawe?” te wagobeo.

⁵Te kingo po tigidali wali pabo bidi yaibaso, te aga bugagia bidaibao, me tede te konea pai bidi mugo te magi sę yabo sogo bodolu munama, te sę yabo sunumi konealueibao.

⁶Magi baso meni. Te da bidi dabego sęgę genuai mu pedelali digi tagalao, te tigidali sę dodolabo sogo dąį ilali elalubao.

⁷Te mena sę nosali pedelabo dago konebeo. Te sę dabe yaibao po mena bidigo dabolo me wagobeo.

⁸Te isibo sogo, te dago tigide homu ogwa wai tomode bidali mobo bidi tagalainu ebaso, te dago palibaso, usu egobeo. Te dago isibo sogo bodolu hasegelainu ebaso, usu egobeo. Te hwįbo sogo, te ami tobolu bidi ofisa bidigo te aga ami bidi dabego te boi hwįbo pesage tagalama, te augwa buluba ma begasa pomainu sula tagalogobeo. Te tiwai me, te bidi mego dwai kolesaga wali pobaso da, teda aga te kolesagaba mu dagana selama, te tagalainu ebaso, usu me egobeo.

⁹Te we bidi augwaligo te tobage sę tigidali te tǫde ebo sogo eno sulama, te sogo eno homu kone palobo sę yai. Te sogo eno suali, te genuai bidi dabego te gasa we bidi dabe aiyaba elalubo sę ebo suali. Tama te dwai sę ebogo augwa digi aiyaba elaluali, te me eno suai dao.