Kolesaga Koneai Bidigo Pusali Po Elalubo Buku 7:16-28

¹⁶Tibaso, dago doloba pai kolesaga wali pabo bomo mu eyu, te wiegi yai homu kolesaga sabo sę igimio. Tiyu, dago dena digi dolobo dao.

¹⁷Te me, dago te tobage dwai kolesaga me te wabo pabo bidi dabego ebo homu kolesaga wali pabo bomo mu igio. Tiyu, dago dena isabo sę asesa selebo sę bomo ebo dao.

¹⁸Nage te tobage kolesaga si tomode bilao. Te God dologoba pelama bidibo bidi yaibaso da, teda agai te magi sę yali te tagalao, te wiegi yai naga pedelaibao.

¹⁹Te taunde tobolu bidi nogo si elalubaso, augwaligo te taun bomo yai pedelabo tau somainu yaibao. Tialima, wiegi yai homu kolesagago te bidi me deli boma pai mu pedelama, te taungo tobolu bidi dabego bomo aiyaba elalubo usu yaibao.

²⁰Te doloba pai bidi me deligo wiegi yai kolesaga sesemane sogo me idugobeo. Menio. Me sogo agai me sęgę sabo dao.

²¹Nago te we bidi augwaligo mibo po tigidali me odogio. Te nago augwaligo wabo poba bugagia olo mubaso da, te naga sę bidigo nage posobo po dwai wabo te nago odobo homu yaibao.

²²Magi baso meni, nago te tiwai koneao, hauwa sogo naga digi nago gasa bidi posobo dwai po wabo dao.

²³Eno te tama homu ebo tigidali bugagia homu kone palali, te aga page mu gegela suainu yali, magi baso meni, ena te homu kolesaga mu konea pabo bidi mu pedelainu yali. Tiali goli, eno homu kolesaga te usu ebeo.

²⁴Te tigidali nai pedalubo page hanilama gegainu ebo sę te genuai mu dao. Dago te digibulu uganu mu elalubo nai, ma te aiyanu mu elalubo nai, te dago sueinu gegebo tiwai ebao. Tialima, dego mu te nai dabe page elalubo gegelama sueibawe?

²⁵Tialima, eno sągą dili bomo mu selama dolalu, te eno sę bomo eyu, te tobage wiegi yai homu kolesaga tigidali sabo sę bomo yali. Tama eno te tobage dwai kolesaga page me gegelama, koneabo sę bomo eyu, te wabo pabo bidigo homu kolesaga tiwai ebo gegebo sę bomo ebo dao.

²⁶Eno te tiwai page gegelama suali, te isibo kolesaga te ha ebo nai tiwai dao. Tiali goli, te bidi dali dwai sę yainogo sinabo we te bidi bolo tubo kę tiwai dao. Te da te ha mu ebao. Te tobage we da, te sųgų hagane togobo wa tiwaigo da bidi tola sobao. Te agai nogo te sen tiwaigo da kalabus ebao. Godigo te bidi me deli godolo ebaso da, teda te bidigo te tobage hagane togobo wa gedelama, wi paibao. Tialima, te hagane togobo wago te sęgę sabo bidi dabe tola sobaso, te augwali me geda muyu, ela soagobeo. Mu menio.

²⁷Homu kolesaga mu konea pali bidigo te tiwai po wali, mu tamao, eno te tigidali sę page koneainu sę dua dua ela pelama, tama megi da, eno te we dabe sibigo kolesagade koneai dao.

²⁸Eno te wiegi yai we me deli gegebo sę yali, tama eno gegebo gegebo sę yali, menio. Te bidi sese umabo hauwa te tausen we bidi dabe tomode, eno suali, te deli deli wiegi yai bidi bidali. Tialima, eno te wiegi yai we deli bidibo me subeo.