Kolesaga Koneai Bidigo Pusali Po Elalubo Buku 3:10-21

¹⁰Te tobage sęgę tigidali Godigo dabolo mubo eno mu konea palio.

¹¹Godigo digi te tigidali nai pedelabo sogo bodolu muani, tama augwali te wiegi yai sogo bodolu muanide mu pedelaibao. Tama me agai dago homu hodolama, tama dago te polobadu pedelali nai dabe konemai da homu eyu, tama te nosali pedelabo nai me konemainu homu eyu tama tiali. Tiali goli, Godigo aga polobadu digi ela pali sę tigidali te nosaliba mu usu nama, te dago mu konemainu ebo sę ebeo.

¹²Eno te naide homu kone palama, tama eno koneani, te uganu ela holobo kolesaga me deli elalubao. Te kolesaga e tiwai dao. Dago wiegi yai pemene eyu, te wiegi yai kolesaga da e tǫde bidadubadi ebaso, te usu yaibao.

¹³Tama me, dago nai me ąį me tuyu, te dago ebo sę tigidalide wiegi yai homu pemene emainao. Te Godigo dabolo te tobage wiegi yai homu pemene ilibo sę dabolo mabo dao.

¹⁴Eno koneanio, te Godigo kolesaga me hasegeligobeo. Menio. Te sesemane sogo elalua pidu, elalua paibao. Niwai bidi me deligo kolesaga te Godigo kolesaga dabeba wadolobaso, usu me egobeo. Te niwai bidi me deligo te Godigo kolesaga me hųgią sąyu, sela sągobeo. Godigo te tiwai sę yali, te we bidi dabe augwali agade wi eyu, aga dologode naga bidimainu yai dao.

¹⁵Te megi pedalubo nai tigidali, augwali te polobadu pedelalio. Te nosali pedelabo nai tigidali, augwali me polobadu pedalali. Godigo te polobadu pedelali nai tigidali te me tama elalua pomainogo iligobeo. Menio. Agai te nai dabe ma holomainu ilibo sę ma ebo dao.

¹⁶Eno te tǫde gasa kolesaga me elalubo suali. Te wiegi yai doloba pai kolesaga wali pabo sę elalubo bidi dabe, augwaligo te kolesaga wali ma pabo meni. Menio. Augwaligo dwai kolesaga mu wali pabo dao.

¹⁷Eno tede te tama homu yalio, te Godigo we bidi dabe augwali po tų ilibo sogo, agai te doloba pai kolesaga tigidali yali bidi dabe, me dwai kolesaga yali bidi dabe dagalobo sogo dąį ilali elalubao. Magi baso meni, te tigidali sę yabo si te elalubao, te tigidali yali kolesaga ma dodolobo sogo me elalubao.

¹⁸Tama me eno te tama homu yali, te da bidi dabe da, Godigo da usu siyu, dabolo te tiwai ola mobao, da bidi dabe te kibu hasa dabe tobage tiwai si naga elalubao.

¹⁹Magi baso meni, da bidi silibo te hasa dabe tiwai si ebao. Te hasa dabe isaibao, te da bidi me isaibao. Bidi me, hasa me, te mobo kekebo da, te tama tebo te si dali sigo bidibo ula elalubao. Tibaso, te bidigo bidibo ulago te hasago bidibo ula aiyaba me elalugobeo. Menio. Augwali sigo bidibo ula te olo nai tiwai si tiwai dao.

²⁰Godigo tǫ selama, augwali si nigali, tialima augwali si isibo si da, te augwali si tǫ tiwai ma pedelaibao.

²¹Bidi mebago homugo te bidigo noma mobo te ugwaba holobo homu, te hasa dabego mobo noma te tǫba aiyaba dulubao homu ebao. Tialima, dego mu te sę page koneabo usu yaibawe?