Kolesaga Koneai Bidigo Pusali Po Elalubo Buku 1:6-18

⁶Wali te not badu hogodama, te saut badu pedaiba solama, te ma begelama, te not badu soabo da. Te tama kolesaga eyu, te wali sesemane sogo bagula bilibo dao.

⁷Te tigidali asobo ąį te tamu ąįba udula pobao, tiali goli te tamu ąį me pągąbeo. Nosali, te ąį dabe te asaliba ma begasa holaibao, tama ma dulubo dao.

⁸Dago e tǫde tigidali naide homu kone paludu, te dago augwalide hagela mu ebo da. Dago te hagela ebo po hanilama pusubaso, usu me egobeo. Dago te tobage nai dabe sulama, te tobage po dabe odobadi yali, tiali goli te tebo sęgo da haliga pemene ilama, mu usu nabo me ebo menio.

⁹Te polobadu pedelali nai dabe da, te nosali ma pedalubo da. Te bidi dabe augwaligo te polobadu yali sę dabe, te sę dabe gasa bidi dabego ma yaibao. Te e tǫde gesi sę me elalube dao.

¹⁰Te me sogo te bidi dabego te tama po obao, “Te e da, te gesi noma nai me deli da,” po wali. Tiali goli, te menio. Polobadu mu digi te nai me elaluali, te da e tǫde ame nenama bidisąbadi te nai elaluai dao.

¹¹Te bidi me deligo te polobadu bidali bidi hani, te wąį nǫų dabe augwalide te homu ma kone palobo menio. Tama da tudi badu pedelabo bage, te nosali badu mu pedalubo bidi dabe augwaligo te bagede homu kone me palogobe da.

¹²Ena te kolesaga koneai bidi, ena te Israel dabego king bidu, te ena Jerusalemde bidai dao.

¹³Eno te e tǫde pedelali nai tigidalide homu kolesaga koneabo homu mu yali, tama eno te page hania mu bugagia dagala sigi da homu kone palali. Tiali goli, te sę Godigo dabolo mani te genuai sęgę mu elalubo dao.

¹⁴Eno te tǫde pedalubo nai tigidali sula silali, te mu tama, te nai dabego page mu me elalusiąwai, te bidi me deli udayu, te wali nogogo tola sainu ebo tiwai ebo dao.

¹⁵Te gagea pali nai dabe, te dago dodolainu ebo usu egobeo. Te elalusiąwani nai dabe, te dago me nedegobeo.

¹⁶Eno te tama homu yali, eno te genuai homu kolesaga mu koneani, tama te polobadu Jerusalemde king bidali bidi dabego koneani homu kolesaga tigidali aiyaba elaluali. Eno wiegi yai homu kolesaga mu koneai dao.

¹⁷Eno te wiegi yai homu kolesaga hanilabo sę bomo yali, te kolesaga umuna pabo tobage sę page me gegabo sę bomo yalio. Tiali goli, ena odolali sę dene yali, te bidi me deligo te wali tola sainu pobebo tiwai yalio.

¹⁸Mu tama, te homu kolesaga hauwa koneani bidigo, te aga homu kone kolesaga konebo te genuai uga uga ela holobo sogo, te agai haliga sęgę genuai mu pedalubo dao.