Kolesaga Koneai Bidigo Pusali Po Elalubo Buku 10:7-20

⁷Tama me eno suali, te olo sę ebo bidi dabe te hos kibu daide ugadu dugulasa pabo suali, tiali goli te genuai bidi dabe te sągągo pali, te olo sę ebo bidi dabe pabo tiwai yali.

⁸Te bidi mego genuai tǫ dedage dogobaso da, teda aga digi te dedageba tulalueibao. Ma, te bidigo te masigigo bagulali obo alubaso da, teda te hasamanigo aga gąų kelaibao.

⁹Ma, bidigo te be sę yabo masigi togobo sę ebaso da, teda me sogo te masigi dabego aga tigi selaibao. Te ni pedebo sę ebo bidi, me sogo te nigo aga dolaibao.

¹⁰Te bidigo puna pai sigi hwą agai dulusiąwai yaibaso da, teda agai te ni gelebo sinabo sę dene mu yaibao. Me ma, te wiegi yai kolesaga elalubo bidigo da, te agai te ni gelebo sę wiegi yai yaibao.

¹¹Te bidi mego te hasamani dua digi bidimainu ebo kolesaga elalubo bidi yaibaso, te wiegi yai da. Tialima, te hasamanigo aga gąų kelemainu ilibo bidi yaibaso da, teda aga te koneani kolesagago aga magi elama tau saibawe?

¹²Te wiegi yai homu kolesaga elalubo bidigo aga wabo pogo digi te agaba genuai nogi mawaibao. Tialima, te wiegi yai homu kolesaga elalusiąbo bidi te aga pogo digi aga dolaibao.

¹³Te tobage bidigo po gagalama wabo sogo, agai wabo po geda mueibao. Te agai po silainu ebo sogo, te po dwai mu pedelali, te kolesaga umuna sai bidi mugo wabo po tiwai yaibao.

¹⁴Te wiegi yai homu kolesaga elalusiąbo bidigo po oda pidu gebo dao. Te magi sę nosali pedelabo dago konebeo. Te da isai madigi, magi sę e tǫde pedelabo dago konebe dao.

¹⁵Te wiegi yai homu kolesaga mu elalusiąbo bidigo agai te aga beba pabo sunumi gegebaso, usu meni yaibao, te tobage bidigo odolali sę dene eyu, te aga bomo sia sabo dao.

¹⁶Hobede yao! Te tǫ kantri pedai king me deli te ogomani homu tiwai elalubadi, tama te kantrigo polalubo bidi dabego te kigamu digi hodolama, te nai da naga tueinogo ebaso da, teda genuai sęgę te tǫ pedai kantriba pedelali.

¹⁷Me ma, te gasa tǫ pedai kantri king me deli te genuai bidigo ogwa yaibaso, tama te tǫ kantri polalubo bidi dabego te genuai nai da tuyu, te ąį tuyu yali te sogo, te tigi naga dąų walobo sę naga eyu, te gęǫ page isąbaso da, teda te tǫ kantri bugagia mu bidai dao.

¹⁸Te bidigo aga sę ebo hagela eyu da, te aga be walawala ni dabe gaga paibao. Awe, aga olo naga bidibaso da, teda te be pedu tologa pelama, te tulubage be tomoba pelama, te be dolobo dao.

¹⁹Naigo te bidi pemene ilibo sę ebao, te wain ąįgo te bidi bugai haliga ilibo dao. Tiali goli, mone da, te wiegi yai nai te tobage sę tigidali ebo dao.

²⁰Te naga pibo be habu badu geme dualalu pila muani, te tagalao, nago te dwai posobo po te kingbolo ma te mone elalubo bidibolo me olamuo. Tama me, nago augwaliba dwai homu me igio. Tiyu, te ba me deligo nago te wabo po selama, te augwaliba wagi pidali weyu.