KOHELETE 7:6-25

⁶Kavakava taudia edia kiri na au ginigini uro henunai e aramu reḡedia na heheto; ina danu asi anina.

⁷Momokani, hahehisi ese aonega tauna e hakavaiamu. bona koikoi henitaona ese lalona e hamiroamu.

⁸Kara dokona ese kara matamana e hereaiamu, bona lalo-manau ese lalo-heaḡi e hereaiamu.

⁹Basio badu haraḡa, badina be badu ese kavakava taudia lalodia e noho henidiamu.

¹⁰Basioto “Dahaka dainai nega gunadia ese ina nega e hereaia?” Badina be dia aonega amo so henanadaimu.

¹¹Kohu iabina mai aonegana ida be namo, dina e itaiamu taudia ihanamodia;

¹²badina be aonega ena hegima na moni ena hegima na heto, bona lalo-parara ena hahenamo be aonega ese lalo-parara tauna e naria balahenimu.

¹³Dirava ena ḡaukara ba haeroa: ia ese vada e hagagevaia ḡauna na daika ese baine hamaoromaoroa.

¹⁴Emu namo e badamu dinana ai ba moale, bona emu dika e badamu dinana ai ba laloa, Dirava ese unu ruaosi vada e karadia, taunimanima na basie diba dahaka dahaka ia murinai bae vara helaoreana.

¹⁵Egu mauri asi anina lalonai, ḡau iboudiai vada na itadia: kara maoromaoro tauna na ena kara maoromaoro ai e masemu, bona kara dika tauna na ena kara dika ai ena mauri e hadaudauamu.

¹⁶Metaira ba kara maoromaoro, metaira ba aonega; sibomu ba heala anina be dahaka?

¹⁷Metaira ba kara dika, bona basio kavakava; emu nega do basine ore ai vada ba mase anina be dahaka?

¹⁸Ina na ba kahua tao bona una na basio kahua nege be namo; badina be Dirava garina e garimu tauna na idia iboudiai bogaragidia amo baine raka lasi.

¹⁹Aonega ese aonega tauna e hagoadaiamu; bena ia ese hanua lohiadia gwauta e hereadiamu.

²⁰Momokani, asi kara-maoromaoro tauna ta tanobada ai e kara namomu mo, bona nega ta se kara dikamu.

²¹Taunimanima edia hereva iboudiai basio hakala henidia, emu hesiai tauna baine uduguiraimu bena ena hereva ba kamonai na garina.

²²Lalomu ai vada o diba, nega momo oi ese haida na vada o uduguiraidia.

²³Ina idoinai aonega amo vada na tohoa. Lau nato “Baina aonega”; to aonega egu amo na idauhai.

²⁴E miamu ḡauna na idauhai; ia na dobu, dobu masemase. Daika ese baine davaria diba?

²⁵Lalogu na haloua, baina diba, bona aonega bona ḡau badidia baina tahudia; bona kara dika ena kavakava bona kavakava ena kava kukuha baina dibadia.