KOHELETE 2:12-26

¹²Bena aonega bona kavakava bona lebulebu ma na haerodia; badina be hanua pavapavana murina amo e maimu tauna na ede baine kara toma? E kara gunava karadia mo, ani.

¹³Bena lalogu e parara, aonega ese kavakava e hereaiamu, diari ese dibura e hereaiamu na heto.

¹⁴Aonega tauna matana na kwarana ai, a kavakava tauna na dibura ai e rakamu; ḡau tamona na diba, iboudiai dokodia be tamona mo.

¹⁵Bena lalogu ai nato: Kavakava tauna enai e kaumu ḡauna na lauegu ai danu baine kau; matona, na aonega hereamu anina be dahaka? Ma lalogu ai nato: Ina danu asi anina.

¹⁶Aonega tauna bona kavakava tauna na raruosi basie lalodia tao daudau; badina be dina gabedia ai iboudiai na bae lalodia boio vaitani. Aonega tauna na e masemu, kavakava tauna heḡereḡerena.

¹⁷Taunabunai, mauri na inai heniava; badina be dina henunai e karava karadia na lalogu ese e hisihisilaiva. Badina be iboudiai na asi anidia, Iai ianina mo.

¹⁸Dina henunai na hekwarahilaiva ḡaudia iboudiai na na inai henidiava; badina be murigu ai bainema tauna enai baina rakatanidia.

¹⁹Bona daika dibana ia na baine aonega eiava baine kavakava? A mai aonegagu ida dina henunai na hekwarahilaiva ḡaudia iboudiai na ia ese baine biagudia. Ina danu asi anina.

²⁰Taunabunai, lalogu na na haloua bona daragu e doko, egu hekwarahi idoinai ai dina henunai na ḡaukaralaiva ḡaudia daidiai;

²¹badina be nega haida tau ta ese mai aonegana bona mai lalo-pararana bona mai idibakana ida e karava ḡaudia iboudiai na baine rakatanidia, bena se hekwarahilaiva tauna ese baine moalelai. Ina danu asi anina, bona dika herea.

²²Tau ta ena ḡaukara iboudiai bona ena hekwarahi idoinai dina henunai davadia be dahaka baine abi?

²³Badina be ena dina iboudiai na hisihisi ai e honumu, bona ena ḡaukara na lalo-hekwarahi ḡauna; hanuaboi ai danu ia lalona se laḡa animu. Ina danu asi anina.

²⁴Tau ta ena dala namo-hereana binai: baine aniani, baine inuinu, bona ena hekwarahi baine moalelaia. Bena lalogu e parara, ina danu be Dirava imana amo;

²⁵badina be bema ia dauhai, daika bema aniani eiava bema moale?

²⁶Badina be Dirava ese e lalo namo heniamu tauna na aonega bona lalo-parara bona moale e heniamu; a kara dika tauna na ina hekwarahi e heniamu, ia ese kohu baine habou bona baine hasenu, Dirava ese e lalo namo heniamu tauna ihenina totona. Ina danu asi anina, lai ianina mo.