Kisah Para Rasul 8:24-33

²⁴Angmuse Simon ana oleve iabanang hula, “Nimang. Aulang se, iini noang moling hengi. Iini sambajang metma ma nenang, senge hur ba iini vede vengbanang iila angu, ekang naing vengbaa ekang.”

²⁵Seng angmuse, Petrus bot Yohanis oleve Mutu Yesus Ehur aaung-hama angu emangpi vengsarenta, bot Lahatala Ehur aaung-hama angu metma bendar angu mi vengmaring. Angmuse ini bale Yerusalem mi ila. Ila via mi muse, ini aabang ba propinsi Samaria mi angu mi miari, senge Mutu Yesus Ehur aaung-hama angu metma nehe angmi ang naung di iavomung-iapahang.

²⁶Ang muse Lahatala Egahing vala sorga mi hoa Pelipus aing gahing hula, “Aaung ba aana tahit lamal tang eoat ila, via ba bendar Yerusalem mi hela ila Gasa aabang mi tahi angu ba oa.” Via angu via taimang.

²⁷Vengmeet aulang muse, Pelipus ana tahit lamal. Ana ila via angu mi muse, ana uuling nehe nu ateing. Aing angu, nehe eele Etiopia por taang hoa ba nu. Nehe ba Pelipus ana aing harak angu, aing ba ratu Kandake Etiopa enehe eele angu, ekavasa ang naung emangpi vengurus. Ana ila Yerusalem mi sambajang seng angmuse, ana bale hoa via mi. Pelipus uuling ateing se, ana ekereta angu taang mihit na basa sehi. Ana Lahatala Ehurvala tidat boma Yesaya esurat angu ba basa.

²⁹Angmuse Lahatala ERoh Pelipus aing gahing lamal va kereta angu abung nehe angu aing harak.

³⁰Ana va kereta angu abung sengila ba, ana vengmee se nehe angu tidat boma Yesaya esurat ba basa sehi. Angmuse Pelipus ana taaning hula, “Nimang! Naba ba nimang basa angu aana manggarati, ee niang?”

³¹Angmuse nehe angu ebalet hula, “Niang. Evengbanang tarang angu nehe iiba bae metma nat mateng niang se, tatalange na emanggarati angu ateing.” Angmuse ana Pelipus abanang ot mida abung mihi.

³²Surat ba ana basa angu eamal alang: “Ini Aing masiring lamal, emenghula nehe jumba masiring ila, senge hula sabele angu edadenang. Andi bot emenghula jumba val ba nehe Eaamudi gunti angu edadenang, aarunge Ana bae kalili di niang. Ana bae Ai buka di niang, bot bae hur kokal nu metma nehe ebale di niang.

³³Angmuse ini Ehura-Emananti; Ini Eparkara angu vengputus bae molo niang. Ana bae ahalang iiba ening di niang, aarunge ini Aing ening Ana aamina. Angu ebele Etabaning iiba bae ue niang. Base, nehe iiba bae etabaning angu vengsarenta di niang.”