Kinera Koari na Kinerakera 4:2-14

²Sari livomu si keoro guana rovana sipi tiqe ta kotodi, meke tiqe beto ta huve va via. Sari kali vivi di si koa dia, lopu keke sapu lopu koa.

³Sari berumu si ziṉara va leleana; sa ṉuzumu si doṉo lea pana zama si agoi. Sari paparamu si ziṉara guana pomeqaraneti, pa mudi poko paere isumata.

⁴Sa ruamu si doṉo lea gua tugo sa vetu hakehakei te Devita, pakui nana sari tina na tina lave, doduru si na lave tadi na varane.

⁵Sari karua susumu si guana karua tuna qazele, na karua vivi tanisa kurukuru ṉame qazele sapu korapa henahena dia koari na havoro lili.

⁶Sipu lopu ele kamo sa rane, meke murimuri taloa sa huporo, si maqu sage la i sari karua botu toqere pu humaṉa lea guana oto huda moa, meke na vina uququ oto huda.

⁷Na lua nigo kusui si agoi, qua babaere, loke vasi kisakisamu si goi!

⁸Loaqu, luli taloa koa rau koari na toqere Lebanoni, mae, luli taloa koa rau pa Lebanoni. Gore mae gua pa batu toqere Amana, panaulu pa Seni, sapu sa toqere Hemoni, koari na bae tadi na laione meke na toqetoqere tadi na leopadi.

⁹Ele hikoa goi sa buloqu, agoi na qua babaere, na loaqu; ele hikoa goi sa buloqu koasa vasi kevena sa matamu, meke sa patu ṉedala pa mua pakupaku.

¹⁰Agoi na loaqu na qua babaere, variva qetu hola sa mua tataru; sa mua tataru si liṉiliṉi lea hola nia sa vaeni, sa lumu humaṉa lea koa goi si hola ni sari doduru pule!

¹¹Sari berumu, loaqu, si lomoso guana namu zipale; sa meamu si guana koa ia meleke na kolo zipale. Sari mua poko si humaṉa lea guana huda sida pa Lebanoni.

¹²Loaqu, na qua babaere, agoi si guana inuma ta bara tukuna; na inuma tomena, meke na bukaha ta hukatana.

¹³Sari mua linetelete si na inuma pomeqaraneti siṉia na vuvua lomosodi, meke na havoro naqarita meke na oela nadi;

¹⁴na humaṉa lea tadi na havoro saparoni, na oela kalamusu, meke na huda sinamoni. Na oto huda moa si toqolo vasina meke na aloesi meke doduru lumu humaṉa lea pule.