Kinera Koari na Kinerakera 3:1-8

¹Pa qua teqe pana boṉi vari luli, si doṉo hata ia rau si asa sapu tataru nia sa buloqu; doṉo hata ia rau, ba lopu boka dogoria rau.

²Maqu vura pude qu ene ia sa vasileana lavata, koari na siraṉa na pavasa; maqu doṉo hata ia si asa sapu tataru nia sa buloqu. Ke la hata ia rau, ba lopu boka dogoria rau.

³Sari tie kopu pana boṉi si dogoro au sipu korapa ene pa dia tinavete. Ke nanasi rau, “Vea, dogoria gamu si asa sapu tataru nia sa buloqu?”

⁴Hola ni tugo rau sari kasa si dogoria mo rau si asa sapu tataru nia sa buloqu. Tuqe vagia mo rau meke koroqu vata luara pule ia osolae turaṉa kamo la nia rau koasa vetu tanisa tinaqu, koasa teqe sapu ta gavoro si rau koasa tinaqu.

⁵Gamu na tudia vineki ri pa Zerusalema, tepa gamu rau: Mi zama tokotokoro pa pozadi rina kurukuru made nene na qazele meke na dia pa soloso. Mi lopu okoro nia sa puta turaṉa koreo osolae kamo atu sa mia totoso varihaba.

⁶Esei si korapa mae gua pa soloso qega sana, sa kavuruna si vura sage meke doṉo guana tuṉaha nika, lumu humaṉa lea si asa koari na oto huda ta pozae moa na pauda na gua sapu ta holu mae guadi pa seu?

⁷Dotu! E Solomone tu bisa, ta paleke pa nana habohabotuana sana, ka onomo ṉavulu puta tie varane si ene turaṉana, sari na ṉati varane pa doduruna sa popoa Izireli.

⁸Doduru si tago vedara; na varane ravutudi beto pa vinaripera. Hopeke dia vedara pa kali dia, va nama ni sari tinasuna pu hoke raza pana boṉi.