Kinera Koari na Kinerakera 1:1-14

¹Sa Kinera te Solomone sapu leleana hola koari na kinerakera.

²Mani aho au sa si arau, sari beruna madi aho au, ura sa mua tataru si lomoso hola nia sa vaeni.

³Sa humaṉa lea sapu dalo nia goi si lomoso; sa pozamu si guana lumu humaṉa lea sapu ta zoropaena. Garo gua ke roro igo rina vineki vaqura si agoi!

⁴Mae mamu turaṉa taloa nau; aria mada tuturei! Mani turaṉa nuquru nau sa baṉara koari nana lose. Sari Barikaleqe pa Zerusalema Qetu hola nigo gami si goi. Meke qetu nia gami sa mua tataru hola nia sa vaeni. Sa Vineki Zoṉa gua ke roro igo rina barikaleqe si agoi!

⁵Gamu na vineki pa Zerusalema, muho si rau, ba na leleaqu, sapu muho gua rina ipi mumuhodi tadi na tie pa Kedara, ba leleana gua rina poko pu sigoto pa Zelepade te Solomone.

⁶Mu lopu doṉo toto au sina muho si rau, ura na rimata au ke muho. Bugoro nau ri kasa tasiqu koreo, meke va tavetave au rini pa inuma vaeni, ke sa qua inuma vaeni si lopu boka va tana valeania rau.

⁷Tozi nau, agoi pu roro igo rau, pae korapa turaṉa lani goi sari mua sipi? Pavei kote va aqori goi sari mua sipi koasa rimata korapa rane hie? Na vegua ke kote va paere ia tu rau sa isumataqu koari na mua baere meke sari dia sipi?

⁸Agoi pu tolavaemu hola koari na barikaleqe, be lopu gilania goi sa vasina, si mamu luli sari na pou nenedi rina sipi, mamu va hena ni duduli sari mua qoti pa kali ipi tadi na sepati.

⁹Qua babaere, guana hose mamaqota koari na hose kokoreo tadi na totopili varipera te Pero, guni nigo rau.

¹⁰Sari paparamu si doṉo lea, sapu tava saridi koa rina vikulu, gua tugo sa ruamu koa rina pakupaku patu ṉedala.

¹¹Kote tavete ponigo vikulu qolo gami, meke na pakupaku sapu siliva.

¹²Sipu korapa eko pa nana teqe sa baṉara, si kamo la sa tivusuna sa qua lumu humaṉa lea.

¹³Sa qua babaere si guana kuru hite, siṉi ia na lumu humaṉa lea, sapu eko pa vari korapadi rina susuqu.

¹⁴Guana vinarigara havoro humaṉa lea si asa koa rau, sapu havoro pa korapa inuma vaeni pa Eqedi.