Kawandila 9:4-18

⁴Mixi baloxi gbansan nɔma a xaxili tide fe nde ma. Bare ɲiɲɛ fisa yɛtɛ faxaxi bɛ.

⁵Naxee baloxi, nee a kolon a e faxama nɛ, kɔnɔ mixi faxaxie tan mu fefe kolon. Sare fi yo mu na e bɛ sɔnɔn, e xa fe yati bara nɛɛmu mixie ra.

⁶E xa xanunteya, e xa xɔnnanteya, e waxɔnfe, nee birin bara ɲɔn. E tan gbe yo mu na yi duniɲa fee tan ya ma sɔnɔn.

⁷Siga, i i dɛge sɛɛwɛ kui, i i xa wɛni min bɔɲɛ fanyi kui. Ala wama na nan xɔn i bɛ.

⁸I xa sose fiixɛ ragoro i ma, i xa labundɛ fanyi sa i fate ma.

⁹I xa duniɲa igiri sɛɛwɛ kui wo nun i xanuntenyi ginɛ. Ala bara yi simaya nan fi i ma. Hali a to dangima alɔ foye, hali a xɔrɔxɔ, Ala xa maragiri na a ra i bɛ.

¹⁰I nɔma wali naxan na, i xa na raba i sɛnbɛ birin na, barima i naxan nabama duniɲa ma, alɔ walife, fe matofe, fe fahaamufe, nun fe kolonfe, na sese mu na aligiyama i sigafe dɛnnaxɛ.

¹¹N man bara fe gbɛtɛ to yi duniɲa ma: Naxan xulun dangi a boore ra, a mu gbata geenima tɛmui birin xɛ, naxan sɛnbɛ gbo dangi a boore ra, a mu gere geenima tɛmui birin xɛ, naxan xaxili fan a boore bɛ, a mu donse sɔtɔma tɛmui birin xɛ, naxan ma lɔnni dangi a boore ra, a mu naafuli sɔtɔma tɛmui birin xɛ, naxan xa fahaamui gbo a boore bɛ, a mu hinnɛ sɔtɔma tɛmui birin xɛ. Ala xa maragiri tan fe birin nabama a waxati nɛ.

¹²Mixi yo mu a kolon fe fama a lide tɛmui naxɛ: Yɛxɛ suxuma nɛ yɛlɛ xɔrɔxɔɛ kui, xɔni suxuma nɛ gantanyi ra. Na ki fe xɔrɔxɔɛ adamadi tɛrɛnnama nɛ kerenyi ra.

¹³N man bara yi xaxilimaya misaali to duniɲa ma naxan tide gbo.

¹⁴Taa xuri nde nu na, mixi mu nu gbo dɛnnaxɛ. Mangɛ sɛnbɛma nde naxa na taa gere, a fa tede yailan na taa tɛtɛ bunyi.

¹⁵Na taaka nde nu na, naxan findixi setare xaxilima ra. A naxa na taa rakisi a xa xaxilimaya saabui ra, kɔnɔ na dangi xanbi mixi yo mu ratu a xa fe ma.

¹⁶Na kui n naxɛ, Xaxilimaya fisa ɲalamaya bɛ, kɔnɔ setare xa xaxilimaya maberema nɛ, mixi mu a xa masenyi suxuma.

¹⁷Xaxilima xa masenyi raxaraxi ramɛfe, na fisa mangɛ xa sɔnxɔɛ rate bɛ xaxilitaree tagi.

¹⁸Xaxilimaya fisa geresosee bɛ, kɔnɔ yunubitɔɛ keren gbansan nɔma fe fanyi gbegbe xun nakanade.