Kawandila 5:1-14

¹I naxa gbata i dɛ rabide wɔyɛnyi xili ma, i naxa gbata laayidi tongode Ala bɛ, barima Ala tan na koore nɛ, kɔnɔ i tan na bɔxi nan ma. Awa, i xa wɔyɛnyi naxa wuya.

²Alɔ xiye to kelima maɲɔxunyi gbegbe ma, xaxilitareɲa fan kelima dɛ wuya nan ma.

³Xa i bara laayidi tongo Ala bɛ, i naxa dugundi a rakamalide. Xaxilitareɲa mu rafan Ala ma. A lanma i xa i xa laayidi rakamali.

⁴Laayidi tongotareɲa fisa laayidi rakamalitareɲa bɛ.

⁵I naxa tin i xa wɔyɛnyi xa findi yunubi ra. I naxa a fala Ala xa xɛɛra bɛ, «N mu nu wama laayidi yati tongofe.» Na fe mɔɔli Ala raxɔnɔma nɛ, a a niya i xa wali xun xa rakana.

⁶Xiye wuyaxi safe nun wɔyɛnyi tife findixi fe fufafu nan na. Na kui a lanma i xa gaaxu Ala ya ra.

⁷I naxa tɛrɛnna xa a sa li i mixie toma taa kui naxee fuma misikiinɛe ma, e sɛriyɛ kana, e kiiti ɲaaxi sa tinxintɔɛe ma. Mangɛ a boore mangɛ nan malima, han a mangɛya xungbe sɔtɔ.

⁸E birin geenima xɛ samae nan saabui ra, hali mangɛ xungbe.

⁹Kɔbiri rafan mixi naxan ma, a mu wasama. Bannaya rafan naxan ma, a naafuli mu a ralima. Fe fufafu nan na ki.

¹⁰Harige gboma ki naxɛ, a donmae fan gboma na ki nɛ. Na kui munafanyi mundun na harige kanyi bɛ, ba a ya tife ra a harige ra?

¹¹Walikɛ luga ba, a mu luga ba, a xixɔli fanyi rabama nɛ. Kɔnɔ banna xa naafuli a niyama nɛ a mu xixɔli fanyi raba.

¹²N fe magaaxuxi nde rakɔrɔsixi yi duniɲa ma: Kankanfe bannaya ma han a banna tɔɔrɔ,

¹³xa na mu a ra, bannaya lɔɛfe tɔɔrɛ nde saabui ra, a fa li banna xa di mu kɛ sɔtɔ.

¹⁴Adamadi mini ki naxɛ a nga tɛgɛ, a man gbilenma bɛndɛ a mageli ra na ki nɛ. A mu sese xaninma a xun ma a naxan sɔtɔ a xa wali kui.