Kawandila 2:8-24

⁸N naxa gbeti, xɛɛma, nun naafuli mɔɔli birin sɔtɔ. N naxa yelibae sɔtɔ, a nun ginɛ gali adama waxɔnfe xa fe ra.

⁹N naxa findi mixi xungbe ra dangife Darisalamukae birin na naxee nu na beenu n xa bari. N naxa na birin naba lɔnni fenfe ra.

¹⁰N naxa n waxɔnfe mɔɔli birin fen, n mu tondi sese ra naxan nu rafanxi n ma. N ma wali yati nu rafanxi n ma, na nan findixi n ma geeni ra.

¹¹Kɔnɔ n to n ma wali birin mato, n naxan nabaxi tɔɔrɛ kui, n naxa a to na birin fufafu. A nu luxi nɛ alɔ mixi naxan birama foye fɔxɔ ra a mu sese suxu.

¹²Na tɛmui n naxa n ɲɔxɔ sa xaxilimaya nun xaxilitareɲa xɔn ma. Naxan tima mangɛ ra n ɲɔxɔɛ ra, na fama munse rabade?

¹³N naxa a to xaxilimaya fan dangi xaxilitareɲa ra, alɔ naiyalanyi fan to fanxi dimi bɛ.

¹⁴Xaxilima se toma a ya ra, xaxilitare tan a ɲɛrɛma dimi nan kui. Kɔnɔ e firin birin faxama nɛ.

¹⁵Na nan a ra n naxa a maɲɔxun, xa n tan nun xaxilitare birin faxama nɛ, n ma xaxilimaya tide fa na munse ra? N naxa a fala n yɛtɛ bɛ, «Xaxilimaya fan fe fufafu nan a ra.»

¹⁶Xaxilima nun xaxilitare xa fe mu ratuma mixie ra, e nɛɛmuma nɛ e firin birin ma, e firin birin faxama nɛ.

¹⁷Na kui duniɲɛigiri naxa raɲaaxu n ma, barima n bara a kolon n ma wali mu buma. A luxi nɛ alɔ mixi naxan birama foye fɔxɔ ra, e mu a suxu.

¹⁸N ma wali naxa raɲaaxu n ma, barima n bara a kolon fo n xa na birin lu mixi gbɛtɛ yi ra.

¹⁹Na mixi findima xaxilima nan na, ka xaxilitare ra? Nde nɔma na kolonde? Kɔnɔ a tan yati nɔɛ sɔtɔma nɛ n ma wali birin xun ma! Fe fufafu nan na ki.

²⁰Na kui n naxa nimisa wali birin xa fe ra n naxan naba yi duniɲa ma.

²¹Mixi naxan walixi lɔnni nun fatɛ ra, a fa na wali lu mixi nde yi ra naxan mu sese raba na wali kui, na findixi fe fufafu nan na naxan xɔrɔxɔ ki fanyi ra.

²²Mixi geeni mundun sɔtɔma a xa wali nun a xa katɛ kui a naxan nabaxi yi duniɲa ma?

²³A xa wali findixi tɔɔrɛ xɔrɔxɔɛ nan na a bɛ. Hali kɔɛ ra a bɔɲɛ mu malabuma. Fe fufafu nan na ki.

²⁴A lanma mixi xa a dɛge, a xa a min, a xa a xa wali raba sɛɛwɛ kui. N bara a kolon na birin kelixi Ala nan ma.