Katuma 16:24-38

²⁴Unu me ma sokki we udange una nyumo, ma duku tirzizi we ma kunti ati buna.

²⁵In na taaniye Bulus nan silas wa zin biringara nan ire ya sere, u kasu wanna uwe.

²⁶Ara anyumo ani me, uzuruko wadizi udandang u eh, ni tin na soo udenge me sa wa rani; ni zuruko tina tukkum me vat ti pagkino dibedibee, vat inyang me sa atirziza anu me isopso.

²⁷Unu bee uweme sa ma zuma a moro ma iri tina tukum me kang ma gussi nan anume wa susso ma ziki uvira agi madi weki nicee numemen.

²⁸Bulus ma tussan me in nimyirang ni dandang, ma gun “Kati u kunno nicee nuwe iwono vat uru ti rani.

²⁹Unu beh uweme ma gu ca a ehn ima saa, ma wuu dibedibe ma ribe anyumo maka rizo aje an Bulus nan Silas inbi yau.

³⁰A suru we a matara magu “Unu dang nyanini indi wuzi bati a burum”.

³¹Wa gun me “Kaba Ugomo Asere Yeso adi buru we huu nan a kura wee”.

³²Wa bezi me tize tu Ogomo Asere vat uwe akura me.

³³A nyumo uganiya ugunome inniye unu bee akura ukorsuzo anu me, ma ziki we ma kpiji we ti nuru me, vat ume nan ana kura ameme azoro we.

³⁴Ma ziki Bulus nan Silas ma henwe akura ameme, ma nya we imum yare ma wuzi ire kang nan ana kura amemebarki sa wa kaba Asere.

³⁵Sa ahira a sana ma gun ana katuma me “Cekini unu agino me wa dusa”.

³⁶Ma kurzo Bulus tize me agi “Unu dang uru ma nya kudura agi a ceki shi idusa: barki anime suroni dusa a huma”.

³⁷Bulus ma gun we “Ina tiran duru anyumo ana buu, haru anu Romawa sahiki iko uru, wa ka kurson duru; ane ani wa nyara wa suson duru nihunzii, ta gaan duru; ca wa e in na ce awe wa susonduru.

³⁸Wa kuri wa ka buka kadura me ana dang me wa kunna biyau sa a gunan we Bulus nan Silas anu Romawa wani.