Karamɔxɔna 3:3-14

³Faxa ti waxatin na, dandan waxatin fan na. Banxin kala waxatin na, a ti waxatin fan na.

⁴Wuga waxatin na, gele waxatin fan na. Sunu waxatin na, bodon waxatin fan na.

⁵Gɛmɛne woli waxatin na, e matongo waxatin na. Sunbun waxatin na, sunbutareyaan waxatin fan na.

⁶Seen fen waxatin na, a tunun waxatin na. Seen namara waxatin na, a rabeɲin waxatin fan na.

⁷Seni bɔ waxatin na, a madɛgɛ waxatin na. Dundu waxatin na, fala ti waxatin fan na.

⁸Marafanna waxatin na, maraɲaxun waxatin fan na. Yɛngɛ waxatin na, bɔɲɛ xunbeli waxatin fan na.

⁹Walikɛɛn tɔnɔn mundun sɔtɔma a wanli?

¹⁰N bata a to Ala bata adamadiine ti ɲaxankata wanla naxan na.

¹¹Ala bata seen birin da alogo e xa lan e waxatin ma. A mɔn yi a ragidi habadan feene xa lu adamadiine bɔɲɛni. Anu, e mi nɔɛ Ala kɛwanle yɛɛ toɛ keli e fɔlɔden ma han e raɲanna.

¹²N yi a kolon fa fala, sese mi fan muxun na fɔ a xa ɲaxan, a fe faɲin liga a dunuɲa yi gidini.

¹³Muxun birin xa a dɛge, a yi a min, a yi hɛrin sɔtɔ a wanli. Ala bata na nan nagidi muxune ma.

¹⁴N na a kolon Alaa wanle birin luma nɛn habadan, sese mi sama a fari, sese mi bama a ra. Ala na feene ligaxi nɛn alogo muxune xa gaxu a yɛɛ ra.