Kap 96:1-10

¹Yawe do kap kalugɨ kɨnda yaŋ ɨmni. Mɨktɨmɨ mɨktɨmɨ amɨn ekwaŋ, ji Yawe do kap yaŋ ɨmni.

²Yawe do kap yaŋ ɨmɨŋek mani aŋkɨsini. Gɨldarɨ gɨldarɨ amɨn yokwikon baŋ tɨmɨk tɨmɨk asak uŋun dakon geni yaŋ teŋteŋoni.

³Amɨn kɨsisi mɨktɨmɨ mɨktɨmɨ ekwaŋ tɨlɨmni gat ae yo masɨ masɨmɨsi asak uŋun do yaŋ teŋteŋaŋ yomni.

⁴Yawe uŋun wagɨl tagɨsisi, do aŋkɨsiŋ kɨmorɨsi. Uŋun kokup kɨdat morap yapmaŋdak, do si pasal ɨmɨmɨsi.

⁵Mɨktɨm dɨwarɨ dakon piŋkopni uŋun kokup kɨdat dakon wupmɨ gɨn. Mani Yawe da kundu wasagɨt.

⁶Yawe uŋun kɨla amɨn madep egek man madepni taŋ ɨmɨsak. Tapmɨmni madep gat ae yo morapni kɨldani tagɨsi telagɨ yutnikon taŋ ɨmaŋ.

⁷Mɨŋat amɨn kabɨ morap, yaŋ sɨmɨl aŋek Yawe dakon tɨlɨmni gat ae tapmɨm madepni gat do yoni.

⁸Yaŋ sɨmɨl aŋek tɨlɨm madepni do nandaŋek Yawe aŋkɨsini. Paretji tɨmɨgek Telagɨ Yut Madepni da nagalgwan pɨgɨni.

⁹Uŋun telagɨsi ae tɨlɨmni ŋwakŋwarɨsi, do Yawe gawak ɨmni. Amɨn mɨktɨmɨ mɨktɨmɨ ekwaŋ, ji nɨmnɨmɨgek pasal ɨmni.

¹⁰Mɨktɨmɨ mɨktɨmɨ egɨ aŋaŋ kwaŋ uŋun dakon amɨn yaŋ yoyɨni, “Yawe uŋun kɨla amɨn madep egɨsak. Uŋun da mɨktɨm daman aŋteban aban wayɨŋ dɨma asak. Yawe da don gen kokwin pi kɨlegɨsi aŋek amɨn dakon aŋpak kokwin akdɨsak.”