Kap 94:4-18

⁴Amɨn yokwi da iyɨ do nandaba wɨgakwa aŋpak yokwini aŋ uŋun do pɨbɨt tɨdok aŋ.

⁵Yawe, mɨŋat amɨn kabɨ gaga do manjɨgɨl, amɨn da pabɨŋ yopmaŋek jɨgɨ madepsi yomaŋ.

⁶Uŋun da sakwabat gat, ae mɨŋat monjɨyo meŋi datni yopmaŋ kɨmakgwit gat, ae amɨn kokup ŋwakŋwarɨkon da apgwit da mɨktɨmninon ekwaŋ, uŋun dapba kɨmokgoŋ.

⁷Aŋek yaŋ yoŋ, “Yawe da nin dɨma nindasak. Israel amɨn dakon Piŋkop yo nin da amaŋ uŋun do nandaba kɨk dɨma asak.”

⁸Nandak nandakji mɨni amɨn, mɨrak yopmaŋek butji pɨsoni! Ji ŋugɨgɨsi. Ni bɨsapmon nandaŋ kokwin tagɨsi amɨn dagoni?

⁹Piŋkop da mɨraknin wasagɨt, do arɨpmɨ dɨma nandɨsak, ma? Ae dabɨlnin wasagɨt, do iyɨ arɨpmɨ dɨma sɨŋtosak, ma?

¹⁰Mɨŋat amɨn kabɨ egɨ aŋ aŋ kwaŋ kobogɨ yokwi yomɨsak, do ji do kobogɨ yokwi arɨpmɨ dɨma damjak, ma? Uŋun mɨŋat amɨn morap kɨsi dakon yoyɨŋdetni. Uŋun nandak nandakni mɨni, ma?

¹¹Yawe da mɨŋat amɨn morap kɨsi dakon nandak nandak kɨlɨ nandaŋ mudagɨt. Uŋun nandɨsak, yo morap ak do nandaŋ, uŋun bamɨ tagɨsi dɨma noman tokdaŋ.

¹²Yawe, gak da amɨn kɨnda aŋmɨlɨp akdo tepmɨ ɨmɨŋek nawa gengo iyɨŋ dekgi kaŋ, uŋun amɨn kɨsɨk kɨsɨk tagɨ asak.

¹³Jɨgɨ bɨsapmon gak da yɨk yawot ɨmɨsal. Yaŋgɨn egakwan amɨn yokwi kɨmagek mɨktɨm kagagwan pɨkwaŋ.

¹⁴Nido, Yawe da mɨŋat amɨni arɨpmɨ dɨma yopmaŋ detjak. Asisi, mɨŋat amɨn kabɨ iyɨ do manjɨgɨt uŋun manji arɨpmɨ dɨma yomjak.

¹⁵Ae don aŋpak kɨlegɨkon da gen kokwin akdaŋ. Aŋakwa amɨn kɨlegɨ da uŋun yoldaŋ.

¹⁶Namɨn da nak aŋpulugaŋek amɨn yokwi pabɨŋ yopjak? Namɨn da nak aŋpulugaŋek amɨn gulusuŋ aŋ uŋun pabɨŋ yopjak?

¹⁷Yawe da nak dɨma aŋpulugagɨt tam, bɨsap dubak dɨma kɨmakbi tamokon pakgɨm.

¹⁸Nak yaŋ nandagɨm, “Kandapno sagalegɨ, do kɨlɨ uŋun maŋ nɨtdɨsak.” Mani dɨma. Yawe, nak do but dasi galak taŋ namɨŋek abɨdaŋaki dɨma magɨm.